اسلام آباد (این این آئی)وفاقی حکومت نے ایم ڈی پی ٹی وی ارشد خان کو عہدے سے ہٹاکر کیپٹن ریٹائرڈ حسن کو عہدے کا چارج سونپ دیا ہے ۔ جمعرات کو جاری نوٹیفکیشن کے مطابق کیپٹن (ر )حسن کو ایم ڈی پی ٹی وی کا اضافی چارج سونپ دیا گیا۔وفاقی وزیر اطلاعات و نشریات فواد چوہدری نے ارشد خان کو ایم ڈی پی ٹی وی کے عہدے سے ہٹائے جانے کی تصدیق کرتے ہوئے کہا کہ نئے ایم ڈی کی تقرری کیلئے
42 درخواستیں موصول ہوئی ہیں اور نئے ایم ڈی کیلئے مروجہ طریقہ کار پر عمل کیا گیا۔یاد رہے کہ کیپٹن (ر )حسن کو ارشد خان سے پہلے بھی ایم ڈی کا اضافی چارچ سونپا گیا تھا۔ واضح رہے کہ وفاقی وزیر اطلاعات و نشریات چوہدری فواد حسین اور سابق ایم ڈی پی ٹی وی ارشد خان کے درمیان اختلافات شدت اختیار کر گئے تھے اور دونوں نے قائمہ کمیٹی کے اجلاس میں ایک دوسرے پر الزامات کی بارش کردی تھی۔
