پشاور ( آن لائن)پشاور ریپڈ بس منصوبے میں بم پروف اور زلزلہ پروف مقامات بھی تعمیر کر لئے گئے ہیں جبکہ باچا خان انٹرنیشنل ائیر پورٹ کی طرف جانے والے شاہراہ پر بھی بی آر ٹی کے سٹیشن کی تعمیر آخری مرحلے میں داخل ہو گئی ہے چمکنی سے ہشتنگری تک سائیکل ٹریک بھی مکمل ہو گیا ہے اور 100سے زائد سائیکلز بھی 23مارچ سے قبل بی آر ٹی سٹیشنز پرموجود رہینگے۔

ابتدائی طور پر 220بسیں 20روٹس پر چلیں گی ۔ جبکہ بی آر ٹی بسوں کے لئے چمکنی اور حیات آباد میں ٹرمینل کی تعمیر کاکام بھی آخری مرحلے میں داخل ہو گیا ہے ۔ صوبائی حکومت نے پشاور میں جاری بس ریپڈ ٹرانزٹ منصوبے کی جلد ازجلد تکمیل اور اسے بین الاقوامی معیار اور تقاضوں کے تحت مکمل کرنے کا اعادہ کیا ہے تاکہ عوام کو بین الاقوامی معیار کی سفری سہولیات کم سے کم کرایہ میں دی جا سکیں ‘ اس حوالے سے پراجیکٹ کے ترجمان کے مطابق کام 24گھنٹے جاری ہے جس کیلئے جدید مشینری استعمال کی جا رہی ہے ترجمان کے مطابق کام کرنے والی کمپنی مقبول اینڈ سنز کیلسنز اور سی آر 21جی نامی کمپنیاں اس وقت تمام امور بین الاقوامی معیار کے مطابق سرانجام دے رہی ہیں ترجمان نے بتایا کہ پراجیکٹ کے دورانیہ میں اضافہ مختلف مقامات پر پراجیکٹ کو توسیع دینے کی وجہ سے کیاگیا ہے جبکہ ٹریفک کی روانہ کو بھی جاری رکھا گیا ہے‘ ترجمان نے اس بات کا بھی اعادہ کیا کہ کسی قسم کے معیار پر سمجھوتہ نہیں کیا جا ئے گا اور صوبائی حکومت کی جانب سے کیاگیا بین الاقوامی طرز کا سفری منصوبہ پایہ تکمیل تک پہنچایا جائے گا جس کیلئے منصوبہ بندی کرلی گئی ہے