کراچی(یوپی آئی) وزیر اعلیٰ سندھ کے مشیر اطلاعات و قانون اور اینٹی کرپشن بیرسٹر مرتضیٰ وہاب نے کہا ہے کہ تحریک انصاف کے سینیٹرز کا بزنس کلاس میں سفر کرنا ریاست مدینہ کے خود ساختہ حکمرانوں کو زیب نہیں دیتا یہ سیاست نہیں بلکہ منافقت ہے۔اپنے جاری بیان میں انہوں نے کہا کہ وزیراعظم عمران خان کی اپنے سینیٹرز کو بزنس کلاس میں سفر کرنے پر سرزنش کرنا اس بات کا ثبوت ہے کہ ان میں قیادت کا فقدان ہے اور وہ اپنی جماعت کے راہنماؤں کو بتائیں کہ سادگی کیا ہوتی ہے۔
انہوں نے کہا کہ برطانیہ کا سفر جہاز کی بزنس کلاس میں کرنا کیا ریاست مدینہ کے حکمرانوں کا حق ہے اپنے انداز و اطوار سے تحریک انصاف کے راہنما ریاست مدینہ کے نام نہاد خادم نہیں بلکہ مغلیہ سلطنت کے شہزادے لگتے ہیں اور ان کے لیڈر شہنشاہ جہانگیر بنے ہوئے ہیں۔ انہوں نے کہا کہ وزیراعظم کا بزنس کلاس میں سفر کرنے پر سینیٹرز پر برہم ہونا ان کی قیادت کی ناکامی کا ثبوت ہے۔ پاکستان پیپلز پارٹی نے کبھی بھی سیاست میں منافقت کا سہارا نہیں لیا وزیراعظم عمران خان خود تو ہیلی کاپٹر میں اڑان بھرنے کے عادی ہیں اور ان کے وزیر مشیر بزنس کلاس میں سفر کرنے کے شوقین ہیں۔ انہوں نے مزید کہا کہ شیخ رشید کی سترہ گاڑیوں کے شاہی قافلہ میں آمد ان کی کھلی منافقت ہے شیخ رشید کی باتوں اور عمل کو منافقت کے سوا کوئی دوسرا نام نہیں دیا جا سکتا۔ انہوں نے کہا کہ وزیراعظم اپنے شاہی دربار کے اراکین کو بتائیں کہ سادگی کا مطلب کیا ہے اور سیاسی مخالفین پر الزام تراشیاں کرنا اور خود مغلیہ شہزادوں کے انداز اپنانا تحریک انصاف کا سلوگن ہے۔ وزیر اعلیٰ سندھ کے مشیر اطلاعات و قانون اور اینٹی کرپشن بیرسٹر مرتضیٰ وہاب نے کہا ہے کہ تحریک انصاف کے سینیٹرز کا بزنس کلاس میں سفر کرنا ریاست مدینہ کے خود ساختہ حکمرانوں کو زیب نہیں دیتا یہ سیاست نہیں بلکہ منافقت ہے۔
