اسلام آباد (این این آئی) وزیر اعظم کے معاون خصوصی برائے سمندر پارپاکستانیز سید ذوالفقار عباس بخاری نے کہا ہے کہ وزارت سمندر پار پاکستانیز نے بیرون ممالک کمیونٹی ویلفیئر اتاشیوں کی تعداد بڑھانے اور اوپی ایف کے معاملات میں مزید بہتری کا فیصلہ کیا ہے،خلیجی ممالک میں ایسے افراد جو اردو کیساتھ ساتھ عربی زبان پر بھی عبور رکھتے ہیں انہیں عوام کے مسائل کیلئے استعمال کیا جائیگا۔بدھ کو وزیر اعظم کے معاون خصوصی برائے سمندر پارپاکستانیز سید ذوالفقار عباس بخاری نے

میڈیا سے بات چیت کرتے ہوئے کہا ہے کہ وزارت سمندر پار پاکستانیز نے بیرون ممالک کمیونٹی ویلفیئر اتاشیوں کی تعداد بڑھانے اور اوپی ایف کے معاملات میں مزید بہتری کا فیصلہ کیا ہے۔ انہوں نے کہا کہ اوپی ایف کی تشکیل نو کی ضرورت ہے جس پر ہم کام کررہے ہیں ، مختلف ممالک میں کمیونٹی ویلفیئر اتاشی اوپی ایف کے سفیر ہوتے ہیں،ہم نے ویلفیئر اتاشیوں کو کہا ہے کہ وہ کمیونٹی کے مسائل کے حل کیلئے زیادہ محنت سے کام کریں۔ انہوں نے کہا کہ متحدہ عرب امارات میں 3کمیونٹی ویلفیئر اتاشی ہیں جن کی تعداد 4 کی جائے گی۔ سعودی عرب میں اس وقت 4کمیونٹی ویلفیئر اتاشی خدمات سر انجام دے رہے ہیں وہاں پر ان کی تعداد 6کر رہا ہوں اور 6ماہ بعد سعودی عرب میں ویلیفیر اتاشیوں کی تعداد 8کر دی جائے گی ، انہوں نے کہا کہ پاکستان سے لوگوں کو بھیجنے کی وجہ سے اخراجات میں بہت زیادہ اضافہ ہوتا ہے اس لیے ہم ایسی کمیٹی تشکیل دے رہے ہیں کہ خلیجی ممالک میں ایسے افراد جو اردو کے ساتھ ساتھ عربی زبان پر بھی عبور رکھتے ہیں انہیں عوام کے مسائل کے لئے استعمال کیا جائے گا۔ انہوں نے کہا کہ ایسے نمایاں پاکستانی جو سعودی عرب ، قطر میں مقیم ہیں ہم انہیں پاکستانی کمیونٹی اور ویلفیئر اتاشیوں کی مدد کیلئے سسٹم میں لانا چاہ رہے ہیں اور وہ لوگ بڑے شوق سے کام کریں گے۔ وزیر اعظم کے معاون خصوصی نے کہا کہ خلیجی ممالک میں ترجمان کی وجہ سے کافی مسائل ہیں، غریب آدمی ترجمان کا محتاج ہوجاتا ہے، ہم چاہتے ہیں کہ ترجمان پاکستانی ہو جو پاکستان کے حقوق کیلئے عربی زبان بول سکے ۔