اسلام آباد(آن لائن) ترجمان مسلم لیگ (ن) مریم اورنگزیب نے کہا ہے کہ عالمی ادارے نے حکومت کی نااہلی، جھوٹ اور دھوکہ دہی کا بھانڈا عالمی چوراہے پر پھوڑا ہے موجودہ نالائق ٹیم پاکستان کی معیشت کو تباہ کرنے کے درپے ہے ،وزیراعظم عمران خان کی انا اور غرور شہباز شریف کے دیئے گئے مشورے کی راہ میں رکاوٹ بن جاتا ہے۔ اپنے ایک بیان میں مریم اورنگزیب نے کہا کہ حکومت ملک کو دانستہ دیوالیہ پن کی کھائی میں دھکیل رہی ہے وزیراعظم عمران خان معیشت کے معاملے پر یوٹرن لیں اور معاشی صورتحال پر اپوزیشن سے مشاورت کریں
جب سے عمران خان اقتدار میں آئے ہیں روزانہ قوام کو بری خبر مل رہی ہے عالمی ادارے کی رپورٹ میں تصدیق کی گئی ہے کہ2018ء کے عام انتخابات کے بعد سے مالیاتی عدم توازن کے پہلو پر توجہ نہیں دی گئی رپورٹ ثابت کر رہی ہے کہ حکومت دانستہ دیوالیہ پن کی کھائی کی جانب بڑھ رہی ہے مریم اورنگزیب نے کہا کہ قائد حزب اختلاف شہباز شریف نے پہلے ہی دن میثاق معیشت پر تمام جماعتوں کی کانفرنس بلانے کا مشورہ دیا تھا لیکن عمران خان کی انا اور غرور شہباز شریف کے پاکستان کے مفاد میں دیئے گئے مشورے کی راہ میں رکاوٹ بن جاتا ہے۔
