لاہور ( این این آئی)انویسٹی گیشن پولیس ستوکتلہ نے چند روز قبل ستوکتلہ گاؤں میں گھریلو ناچاکی کی وجہ سے اپنی دو بیویوں کو قتل کرنے والے ملزم ریاست علی عرف جگا کو آلہ قتل سمیت گرفتار کر لیا۔ تفصیلات کے مطابق چند روز قبل ستو کتلہ گاؤں میں دوہرے قتل کی واردات کا نوٹس لیتے ہوئے ایس پی انویسٹی گیشن صدر راشد ہدایت نے انچارج انویسٹی گیشن ستوکتلہ سب انسپکٹر محمد نواز کی سربراہی میں پو لیس ٹیم تشکیل دی ۔ انچارج انویسٹی گیشن ستو کتلہ اور پولیس ٹیم نے جدید ٹیکنالوجی کا استعمال اور موبائل لوکیشن کی مدد سے دوہرے قتل کی
واردات کے ملزم ریاست علی عرف جگا کو چیچہ وطنی سے آلہ قتل سمیت گرفتار کرلیا ۔ دوران تفتیش ملزم نے بتایا کہ اس کی اپنی دونوں بیویوں بشیریٰ بی بی اور نسرین کے ساتھ آئے روز لڑائی جھگڑا رہتا کئی بار انہیں لڑائی جھگڑے سے منع کیا لیکن بعض نہ آئیں تو میں نے غصے میں آکر فائرنگ کر کے دونوں کو قتل کر دیا۔ ایس پی انویسٹی گیشن صدر راشد ہدایت نے دوہرے قتل کی واردات میں ملوث ملزم کو گرفتار کرنے پر انچارج انویسٹی گیشن ستوکتلہ سب انسپکٹر محمد نواز اور پولیس ٹیم کے لئے تعریفی اسنادکا اعلان کیا ہے ۔
