اسلام آباد (نیوز ڈیسک) حکومت نے گزشتہ روز کنونشن سینٹر میں اپنی سو روزہ کارکردگی کو عوام کے سامنے رکھنے کے لیے تقریب منعقد کی، اس میں عمران خان نے غربت پر قابو پانے کے لیے پلان بتاتے ہوئے دیسی مرغیاں پالنے کا مشورہ دیا، وزیراعظم عمران خان نے کہا کہ غریب خواتین کو دیسی مرغیوں کے انڈے اور چوزے دیئے جائیں گے اور اس منصوبے کے لیے زیادہ سرمائے کی ضرورت نہیں۔
میاں نوازشریف کی احتساب عدالت پیشی تھی اس موقع پر جب وہ اپنی گاڑی میں بیٹھنے لگتے ہیں تو صحافیوں نے انہیں اپنے گھیرے میں لے لیا اور سوال کیا کہ عمران خان کہتے ہیں کہ دیسی مرغی لائیں گے اور کاروبار کریں گے۔ یہ سوال سنتے ہوئے میاں نواز شریف گاڑی میں بیٹھتے ہیں اور صحافیوں کی جانب دیکھ کر بڑی سی مسکراہٹ دیتے ہوئے ہنستے ہیں اور پھر چلے جاتے ہیں۔ میاں نواز شریف کے اس ردعمل نے سب کو ہنسنے پر مجبور کر دیا، دوسری جانب پاکستان مسلم لیگ (ن)کی ترجمان مریم اورنگزیب نے کہا ہے کہ ڈالر کی قیمت میں اضافہ اس بات کا ثبوت ہے کہ حکومت نے آئی ایم ایف کی شرائط مان لیں،وقت اور حالات گواہی دے رہے ہیں کہ انڈے مرغی کی سرکار نہیں چلے گی،، قوم سے جھوٹ بولنے اور دھوکہ دہی پر عمران حکومت مستعفی ہو، حکومت چلانا اور قوم کے مسائل کا حل کرنا عمران حکومت کے بس کی بات نہیں۔ڈالر کی قیمت میں اضافے کے بعد اپنے ردعمل کا اظہار کرتے ہوئے مریم اورنگزیب نے کہا کہ حکومت نے آئی ایم ایف سے معاہدہ کرلیا اور عوام سے جھوٹ بولا، عوام کو بتایا جائے کہ کن شرائط پر آئی ایم ایف سے معاہدہ کیا گیا۔ مریم اورنگزیب نے کہا کہ وزیر خزانہ اسد عمر نے 100 دن کی تقریب میں گزشتہ روز جھوٹ بولا اور قوم کو دھوکہ دیا، فریبی اور جعلی حکومت کا راتوں رات ایک اور بڑا ڈاکہ اور قوم سے دھوکہ سامنے آگیا۔ترجمان مسلم (ن) نے کہا کہ ڈالر کی قدر
میں اضافے سے بدترین مہنگائی آئے گی، قوم سے جھوٹ بولنے اور دھوکہ دہی پر عمران حکومت مستعفی ہو۔مریم اورنگزیب نے کہا کہ ثابت ہوگیا کہ حکومت چلانا اور قوم کے مسائل کا حل کرنا عمران حکومت کے بس کی بات نہیں، وقت اور حالات گواہی دے رہے ہیں کہ انڈے مرغی کی سرکار نہیں چلے گی۔مریم اورنگزیب نے مزید کہا کہ کٹے، مرغیوں اور انڈوں سے معیشت ٹھیک کرنے کا فارمولا دینے والے سے یہی توقع کی جاسکتی ہے۔
