اسلام آباد (آئی این پی) تھانہ رمنا پولیس نے ایف آئی اے اہلکار پر مبینہ تشدد کے معاملے پر چار نامعلوم افراد کے خلاف مقدمہ درج کرلیا، تاہم تشدد کرنے والوں میں مبینہ طور پر ایک نوجوان کو وزیراعظم عمران خان کا بھانجا حسان نیازی قرار دیا گیا ہے۔تھانہ رمنا پولیس نے ایف آئی اے سائبر کرائم سرکل کے ہیڈ کانسٹیبل ممتاز علی کی طرف سے دی گئی درخواست پر ایف آئی آر درج کی ہے، جس میں بتایا گیا ہے کہ 26نومبر کو جوڈیشل کمپلیکس کے باہر گیٹ پر ایک شخص نے مجھے سلام کیا اور
میرا نام پوچھا اور اس نے میری ویڈیو بنانا شروع کر دی ساتھ ہی مجھے گالم گلوچ کرتے ہوئے تھپڑ مارنا شروع کر دیئے اور مجھے جان سے مارنے کی دھمکی بھی دی اور کہا کہ آپ فیصل رضا عابدی کے کیس میں عدالت میں پیش ہوئے ہیں، اس شخص کے ساتھ تین لوگ اور بھی تھے جو وکلاء کے یونیفارم میں تھے،جس شخص نے مجھ پر تشدد کیا اس کی چھوٹی داڑھی تھی۔ ایف آئی اے ذرائع کے مطابق تشدد کرنے والا مبینہ طور پر وزیراعظم عمران خان کا بھانجا حسان نیازی بتایا جاتا ہے۔
