اسلام آباد(مانیٹرنگ ڈیسک )پاک فوج اور اس کے بہادر سپوتوں سے یوں تو پوری قوم ہی محبت کرتی ہے تاہم پاکستان کے ٹرک ڈرائیور پاک فوج کے بہادر سپوتوں کو اپنے ہی انداز میں خراج تحسین پیش کرتے ہیں اور یہ ٹرک جہاں سے بھی گزرتا ہے اپنے ساتھ پاک فوج کے اس جری جوان کی داستان بھی سناتا جاتا ہے۔پشتون ٹرک ڈرائیور جس سے بھی محبت یا عقیدت رکھتے ہیں
اس شخصیت کی تصویر اپنے ٹرک کی باڈی پر بنواتے ہیں اور پاک فوج کے جرنیلوں سے پشتونوں کی محبت دیدنی ہے۔ جنرل ایوب، جنرل ضیا الحق، کے بعدکیپٹن کرنل شیر خان شہید نشان حیدر، جنرل راحیل شریف ایسی شخصیات ہیں جن کی تصاویر پشتونوں کے ٹرکوں پر نظر آتی ہیں اور اس کے علاوہ ایک اور پاک فوج کا افسر ایسا ہے جس نے پشتونوں کو اپنی بہادری اور جرأت کی بدولت مجبور کر دیا ہے کہ وہ ایسا ہی پروٹوکول اور محبت کا اظہار اس کیساتھ بھی کریں۔ یہ کوئی اور نہیں بلکہ دہشتگردوں کیلئے خوف کی علامت اور ان کی دوڑیں لگوا دینے والے کیپٹن روح اللہ شہید ہیں۔ پاک فوج کے بہادر اور شیر دل افسر کیپٹن روح اللہ شہید داستان پٹھان ٹرک ڈرائیور نہیں بلکہ ان کا ٹرک سناتا ہوا شہر شہر گزرتا جاتا ہے۔ کیپٹن روح اللہ شہید پاک فوج کے نہایت بہادر افسران میں شمار ہوتے ہیں۔ آپ کا شمار ان افسران میں ہوتا ہے جن کے کریڈٹ پر درجنوں نہیں بلکہ سینکڑوں آپریشن ہوتے ہیں۔وزیرستان سے کراچی اور کوئٹہ سے لاہور تک پشتون ٹرکوں کے پیچھے کیپٹن روح اللہ شہید کی پینٹنگ دیکھ کر دہشت گرد عناصر بھی سوچ میں ڈوب جاتے ہیں کہ پاکستانی قوم کو کسی صورت ڈرا دھمکا کر خوف زدہ نہیں کیا جاسکتا ۔کیپٹن روح اللہ مہمند شہید ہیں جنہوں نے اکتوبر 2016 میں اپنی جان پر کھیل کرکوئٹہ میں درجنوں کیڈٹس کی جان بچائی تھی۔ اس معرکہ سے پہلے وہ سینکڑوں
کئی ایسے آپریشنز کے ہر اوّل دستے میں شامل رہے ۔باچا خان یونیورسٹی پر دہشت گردوں کے حملہ کے خلاف کارروائی ہویا کرسچن کالونی پردہشتگرد وں کی یلغار، مردان کچہری پر حملہ ہو دیگر آپریشنز ، کیپٹن روح اللہ ہر جگہ اپنے وطن کے دفاع کیلئے سامنے آئے۔ کیپٹن روح اللہ آپریشن ضربِ عضب کے بعد پاکستان آرمی کے ان نایاب ینگ آفیسرز میں سے ایک تھے جنہوں نے 750 سے
زائد انٹیلیجنس بیسڈ آپریشنز میں حصہ لیاتھا ۔ انہوں نے چار سو سے زائد دھشت گردوں کو گرفتار کیا اور دس کو اپنے ہاتھوں سے جہنم واصل کیاتھا۔ان کی بہادری ، جرأت اور وطن سے محبت ہی ہے جو پشتون بھائیوں کیلئے قابل فخر ہے اور یہی وجہ ہے کہ وہ اپنے علاقے کے اس بہادر اور شیر دل پاک فوج کے افسر کی تصاویر ٹرکوں پر بنوا کر ان سے محبت اور عقیدت کا اظہار کرتے ہیں بلکہ کیپٹن روح اللہ مہمند شہید کی تصاویر سے مزین ٹرک کئی حساس علاقوں میں بھی نظر آتے ہیں جن کو دیکھ کر یقیناََ وطن دشمنوں کے تن بدن میں آگ لگ جاتی ہو گی ۔
