اسلام آباد(آن لائن)مسلم لیگ (ن) کی سینٹرل ایگزیکٹو کمیٹی ( سی ای سی) کے اجلاس میں لیگی رہنما نواز شریف کے سامنے ڈٹ گئے اور کہا کہ مسلم لیگ ن کی سیاست کو بند گلی سے باہر نکالنے کیلئے پر زور احتجاج ضروری ہے ، کسی بھی قسم کی مفاہمت ن لیگ کی سیاست کیلئے زہر قاتل ہوگی ۔
سی ای سی اجلاس کی اندرو نی کہانی کے حوالے سے ذرائع نے آن لائن کو بتایا کہ بہت سے لیگی رہنماؤں کو تحفظات تھے کہ لیگی کارکنان کا طرہ امتیاز سڑکوں پر نکلنا نہیں ، ن لیگ کو پاکستانی سیاست میں کبھی بھی اس طرح کے سیاسی حالات کا سامنا نہیں کرنا پڑا ۔ اؔ حتجاج کے لئے لیگی کارکنوں کو سڑکوں پر نکالنا بڑا مسئلہ ہوگا۔اس پر یہ حل نکالاگیا کہ اپوزیشن جماعتوں کے ساتھ ہر طرح سے مفاہمت کی جائے گی بالخصوص احتجاج کیلئے افرادی قوت کے معاملے پر جمعیت علماء اسلام کے سربراہ مولانا فضل الرحمان سے مددلی جائے گی ۔ پہلے مرحلے میں اسمبلیوں میں احتجاج کیا جائے گا، اس سے اگلا مرحلہ لاہور اور دیگر شہروں میں پر امن احتجاج کرنا ہے، تیسرا اور فائنل راؤنڈ لاہور سے موجودہ حکومت کے خلاف لانگ مارچ نکالا جائے گا جس کی قیادت میاں نواز شریف کریں گے۔ لیگی قیادت کے خلاف انتقامی کاروائی کو فی الفور بند کرنے کا کہا جائے گا بصورت دیگر موجودہ حکومت کا چلنا بند کردیں گے۔ ذرائع کے مطابق سابق وزیر اعظم میاں نواز شریف کے سامنے خواجہ آصف ، رانا ثناء اللہ ،خواجہ سعد رفیق اور دیگر ڈٹ گئے ۔ انہوں نے نواز شریف کو باور کروایا کہ کسی بھی صورت میں مفاہمتی پالیسی اور مصلحت گوئی لیگی سیاست کیلئے آخری کیل ثابت ہوگی ۔ اگر احتجاج نہیں کرنا تو باز آئے ایسی سیاست سے ۔
