کراچی (نیوز ڈیسک) تحریک انصاف کے چیئرمین عمران خان کے دو قریبی ساتھی آپس میں الجھ پڑے۔ سماجی رابطے کی ویب سائٹ ٹوئیٹر پر حمزہ علی عباسی نے اپنے ایک پیغام میں حدیث شریف شیئر کی، حمزہ علی عباسی نے لکھا کہ اللہ تعالیٰ کے پیغمبر نبی اکرمؐ نے فرمایا آخری زمانے میں ایسے لوگ بھی آئیں گے جو اسلام کو دنیاوی معاملات کے لیے دھوکہ دہی سے استعمال کریں گے اور لوگوں کے درمیان بھیڑ کی چمڑی پہنے ہوئے ظاہر ہوں گے تاکہ اپنی عاجزی ظاہر کر سکیں۔ ان کی زبان چینی سے زیادہ میٹھی ہو گی لیکن ان کے دل
بھیڑیوں جیسے ہوں گے،(ترمذی)۔ حمزہ عباسی کے اس ٹویٹ پر ڈاکٹر عامر لیاقت مشتعل ہو گئے اور انہوں نے جوابی ٹویٹ پیغام میں کہا کہ کسی حدیث کا حوالہ نہ دو اور حدیث سے مت کھیلو۔ ڈاکٹر عامر لیاقت نے حمزہ علی عباسی کو کہا کہ تم چینل کا قابل نفرت چہرہ ہو اور تم نشے کی لت میں مبتلا ہو، تمہارے لیے بہتر ہے کہ تم اپنی نوکری ’’اداکاری‘‘ کرو، ورنہ میں بھی بتا دوں گا کہ تمہارا عقیدہ کیا ہے اور تم کس کی تبلیغ کرتے ہو۔ اب دفع ہو جاؤ۔اس طرح سوشل میڈیا پر تحریک انصاف کے دونوں رکن آپس میں الجھ پڑے۔
