اسلام آباد(مانیٹرنگ ڈیسک)چیئرمین تحریک انصاف عمران خان اور تحریک انصاف بلوچستان کے سربراہ کے روئیے کے خلاف تحریک انصاف کے 500سے زائد عہدیداروں اور کارکنوں کا مستعفی ہونے کا اعلان۔ پاکستان کے موقر قومی اخبار روزنامہ نوائے وقت کی رپورٹ کے مطابق پاکستان تحریک انصاف کے مرکزی کوارڈینیٹر تعلقات عامہ عظیم کاکڑ، سابق سٹرٹیجک کونسل ممبر و رکن صوبائی کونسل سید نصیب آغا،بانی رکن و سابق
صوبائی نائب صدر سید عمر آغا سمیت 500 سے زیادہ عہدیداروں، کارکنوں اور مختلف اضلاع سے تعلق رکھنے والے صدر اور جنرل سیکرٹری نے پارٹی کے چیئرمین عمران خان اور صوبائی صدر سردار یار محمد رند کے رویئے کیخلاف پارٹی سے مستعفی ہونے کا اعلان کیا ہے۔ جمعہ کے کوئٹہ پریس کلب میں سینکڑوں کارکنوں کی موجود گی میں کئے گئے اس اعلان کے بعد تحریک انصاف بلوچستان میں قدم جمانے سے قبل ہی لڑ کھڑا گئی ہے۔
