اسلام آباد (این این آئی)سیکرٹری خارجہ تہمینہ جنجوعہ نے پاک امریکا تعلقات کی بحالی پر زور دیتے ہوئے کہا ہے کہ تعلقات امریکا کیلئے بھی اتنے ہی ضروری ہیں جتنے پاکستان کیلئے ضروری ہیں ۔ گزشتہ روز یہاں صحافیوں سے گفتگو کے دوران سیکرٹری خارجہ تہمینہ جنجوعہ کا کہنا تھا کہ 70 سال کے دوران جو بات چیت ہوئی اور جو کام ہوا اسے بحال کرنے کی ضرورت ہے۔

تہمینہ جنجوعہ نے کہا کہ ضروری ہے کہ پاکستان اور امریکہ کے درمیان اسٹرکچرڈ ڈائیلاگ ہوں ٗ انہوں نے کہاکہ ہمیں ایک دوسرے کے تحفظات پر بات کرنے کی ضرورت ہے۔سیکرٹری خارجہ نے کہا کہ پاکستان اور امریکا کے درمیان تعلقات طویل مدتی ہیں اور ہمیں امریکا کے ساتھ بات چیت میں تمام ایشوز پر بات کرنا چاہیے۔انہوں نے کہاکہ امریکا بھی پاکستان کیساتھ بات چیت جاری رکھنا چاہتا ہے، تعلقات امریکا کیلئے بھی اتنے ہی ضروری ہیں جتنے ہمارے لیے۔تہمینہ جنجوعہ نے کہا کہ پاکستان اور امریکا دہشتگردی کے خلاف جنگ میں کامیاب شراکت دار ہیں اور دونوں ملکوں نے مشترکہ کوششوں سے القاعدہ کا خاتمہ کیا۔ سیکریٹری خارجہ نے افغانستان کے مسئلے پر بھی بات کی اور کہا کہ ہم نے افغانستان کو 5 ورکنگ گروپس کی تجویز دی ہے ٗیہ ورکنگ گروپ آپریشنل ہوجائیں تو تمام ایشوز پر مستقل بات چیت ہوتی رہے گی۔انہوں نے کہا کہ ورکنگ گروپس تشکیل دیئے تو اس سے بات چیت کا اسٹرکچر بن جائیگا اور ملٹری اور انٹیلی جنس سمیت مختلف شعبوں کی سطح پر بات چیت ہوگی۔

موضوعات:تہمینہ جنجوعہ