اسلام آباد (آن لائن) وفاقی وزیر توانائی اویس لغاری نے روشن پاکستان کے نام سے موبائل ایپلیکیشن متعارف کرا دیا جس میں صارفین واپڈا کی کارکردگی ‘ لوڈشیڈنگ ‘ بجلی چوری اور بل سمیت دیگر معلومات حاصل کر سکیں گے ۔
گزشتہ روز وفاقی وزیر توانائی سردار اویس لغاری نے بجلی سے متعلق روشن پاکستان کے نام سے موبائل ایپلی کیشن کا اجراء کیا ۔ موبائل ایپلی کیشن لانچنگ تقریب سے خطاب کرتے ہوئے انہوں نے کہا کہ سوشل میڈیا پر لوڈشیڈنگ کے حوالے سے حکومت کو بدنام کرنے کی سازش کی جا رہی ہے لیکن اب اس ایپلی کیشن کی وجہ سے دودھ کا دودھ اور پانی کا پانی ہو جائے گا ۔ سردار اویس لغاری نے کہا کہ موبائل ایپلی کیشن کے اجراء کا وعدہ پورا کر دیا ہے جس سے ڈھائی کروڑ صارفین اپنے علاقے کے فیڈر کی معلومات دیکھ سکیں گے ۔ ایپلی کیشن سے واپڈا کی کارکردگی ‘ لوڈشیڈنگ اور بجلی چوری کے حوالے سے معلومات دیکھی جا سکیں گی ۔ انہوں نے دعوی کیا کہ تمام موبائل کمپنیز کی مصدقہ معلومات کو عوام کے سامنے لا رہے ہیں یہ موبائل ایپ نیٹ میٹرنگ کے حوالے سے مدد گار ثابت ہو گا اور فیڈر پر انرجی کامسٹیٹس بھی دیکھا جا سکے گا اس کے علاوہ انہوں نے مزید کہا کہ آج کے بعد لیسکو ‘ پیسکو اور دیگر ڈسٹری بیوشن کمپنیوں کا فیڈر شیشے کی طرح ظاہر ہو گا اور صارفین اپنے بجلی کے بل کے حوالے سے معلومات لے سکیں گے ۔
