اسلام آباد(سی پی پی )صدر مملکت ممنون حسین کو چین کے صدرزی جن پھنگ نے مبارک با د اور نیک تمناؤں کا پیغام ارسال کیا ہے۔ صدر مملکت کو چین کے سفیریاؤ جینگ نے یہ پیغام خصوصی طور پر پہنچایا۔چین کے صدر نے کہا کہ اپنی سالگرہ پر میر ی پر خلوص مبارک باد قبول کیجیے۔انھوں نے کہا کہ پاکستان اور چین آزمودہ کار دوست اور اسٹرٹیجک ساتھی ہیں جو آزمائش کے ہر موقع پر ایک دوسرے کے کام آئے۔
انھوں نے کہا کہ دونوں ممالک کے درمیان زندگی کے ہر شعبے میں تعاون میں تیزی سے اضافہ ہو رہا ہے جو باعث مسرت ہے۔ چینی صدر نے اپنے پیغام میں مزید کہا کہ انھیں پاک چین دوستی سے بے پناہ توقعات ہیں اور دونوں ممالک کی ترقی اور خوشحالی کے لیے آپ کے ساتھ مل کر کام کرنے کے خواہش مند ہیں تاکہ دونوں ممالک
کی سدا بہار دوستی ترقی کرتی رہے۔صدر مملکت نے اس موقع پر چین کے صدر ڈی جن پنگ کا شکریہ ادا کیا اور کہا کہ دونوں ملک عوام کی خوشحالی کے لیے ایک دوسرے سے تعاون کرتے رہیں گے۔ انھوں نے کہا کہ پاک چین دوستی دنیا کے لیے مثال حیثیت رکھتی ہے۔
