کراچی (مانیٹرنگ ڈیسک) شہرقائد میں چائناکٹنگ اور قبضہ مافیا نے ، کھیل کے میدان، رفاہی پلاٹس ،ہل پارک، عزیز بھٹی پارک اور جھیل پارک سمیت اربوں روپے مالیت کے آٹھ بڑے پارکس پر قبضے کا انکشاف ہواہے۔تفصیلات کے مطابق کراچی میں چائنا کٹنگ اور قبضہ

مافیا بے لگام ہوگئے ہیں، اربوں روپے مالیت کے آٹھ بڑے پارکس پر قبضے کا انکشاف ہواہے، جن میں ہل پارک، عزیز بھٹی پارک، جھیل پارک، سٹی پارک سمیت دیگر شامل ہیں۔کراچی میونسپل کارپوریشن (کے ایم سی)کی دستاویزات کے مطابق تمام پارکوں پر چائناکٹنگ اور غیر قانونی الاٹمنٹ کی گئی، ہل پارک پر کے ڈی اے نے 42 پلاٹ غیرقانونی الاٹ کئے، پی ای سی ایچ ایس میں 7 پلاٹ غیرقانونی الاٹ کئے گئے جبکہ ہل پارک کی زمین پر شادی ہال، دکانیں، سنیما تعمیرات کیے گئے۔دستاویزات میں انکشاف کیا گیا کہ عزیز بھٹی پارک میں شادی لان، کلب کو غیر قانونی طور پر الاٹ کیا گیا، جھیل پارک میں 6 ایکڑ اراضی پر ایک سوسائٹی نے قبضہ کیا، جبکہ احمد علی پارک پر واٹر بورڈ اور لینڈ گریبرز نے قبضہ کیا ہے۔سامنے آنے والی دستاویزات کے مطابق اسی طرح سٹی پارک کی 30ایکٹر اراضی پربھی قبضہ مافیا نے چائناکٹنگ کی،نیشنل پارک کو ایک سوسائٹی اور قبضہ مافیا نے ٹھکانے لگایا۔دستاویزات کے مطابق برما گارڈن پر سیاحتی ادارے نے قبضہ کیا اور لاء کالج تعمیر ہوا اور بلک پارک کلفٹن پر ایک کالونی کی تعمیرات ہوئیں۔

موضوعات:چائناکٹنگ اور قبضہ مافیا