سکھر (این این آئی)چیئرمین نیب کیلئے جسٹس (ر)جاوید اقبال کے نام پر اتفاق ہو گیا ہے ۔ اتوار کو میڈیا سے بات چیت کرتے ہوئے اپوزیشن لیڈر خورشید شاہ نے کہاکہ چیئرمین نیب کے عہدے کیلئے جسٹس ریٹائرڈ جاوید اقبال کا نام فائنل کرلیا ہے۔انہوں نے کہاکہ چیئرمین قومی احتساب بیورو کے حوالے سے انہوں نے حکومت کو قائل کیا اور کچھ دیر قبل ایک فون کال پر اس حوالے سے مشاورت بھی ہوئی۔
اپوزیشن لیڈر نے کہا کہ اب تک اس حوالے سے چار ملاقاتیں ہوچکی تھیں جبکہ آج آخری تاریخ تھی اس لیے نام دینا ضروری تھا۔خورشید شاہ نے کہا کہ جسٹس (ر) جاویداقبال ایبٹ آباد کمیشن کے سربراہ رہے ٗان کا ماضی بہت اچھاہے ٗوہ سپریم کورٹ کے جج رہے ہیں اور دعا ہے کہ ایمانداری کے ساتھ اپنے فرائض انجام دیں گے ٗواضح رہے کہ چیئرمین نیب قمر زمان چودھری10اکتوبر2017کوریٹائرہورہے ہیں اور وہ الوداعی ملاقاتیں کر رہے ہیں۔حکومت نے چیئرمین نیب کے لیے تین نام دیئے تھے جن میں آفتاب سلطان ٗجسٹس (ر) رحمت جعفری اور جسٹس (ر) چودھری اعجاز شامل ہیں جبکہ اپوزیشن نے جسٹس (ر) فقیر محمد کھوکھر، جسٹس (ر) جاوید اقبال اور سابق سیکریٹری الیکشن کمیشن اشتیاق احمد کے نام چیئرمین نیب کے لئے تجویز کئے تھے۔جسٹس(ر)جاوید اقبال 2فروری 2000 کو چیف جسٹس بلوچستان ہائی کورٹ بنے جبکہ 28اپریل 2000 کو سپریم کورٹ کے جج بنائے گئے۔انہیں9مارچ 2007کوسپریم کورٹ کاقائم مقام چیف جسٹس بنایاگیا۔
