کوٹ ادو(آن لائن)کوٹ ادومیں ویلڈنگ کرنے کے دوران آئل ٹینکر دھماکے سے پھٹ گیا ،3افراد جاں بحق اور متعدد زخمی ہو گئے،زخمیوں کو طبی امداد کیلئے ہسپتال منتقل کردیا گیا ، دھماکے سے چار دکانیں بھی جل گئیں ۔تفصیلات کے مطابق تھرمل پاور ہاؤس کے قریب ویلڈنگ کرنے کے دوران ایک آئل ٹینکر نے اچانک آگ پکڑ لی جس پر مقامی افراد نے قابو پانے کی کوشش کی مگر ٹینکر زور داردھماکے سے پھٹ گیا جس کے

نتیجے میں 3افراد جاں بحق اور متعدد بری طرح جھلس گئے ۔واقعہ کے فوری بعد امدادی ٹیمیں اور پولیس جائے وقوعہ پر پہنچ گئی اور امدادی کارروائیوں میں حصہ لیتے ہوئے لاشوں اور زخمیوں کو مقامی ہسپتال منتقل کیا ۔ریسکیو ذرائع کا کہنا تھا کہ حادثہ تھرمل پاور ہاؤس کے قریب پیش آیا جب آئل ٹینکر میں ویلڈنگ کی جا رہی تھی، دھماکے کے بعد آگ بھڑک اٹھی جس نے قریبی چار دکانوں کوبھی اپنی لپیٹ میں لے لیا۔ پولیس نے واقعہ کی تحقیقات شروع کردی ہے تاہم ابھی تک کسی کو اس کا ذمہ دار نہیں ٹھہرایا گیا۔۔۔۔۔۔۔