لاہور ،اسلام آباد(این این آئی)لاہور کی سیشن عدالت نے عمران خان پر الزامات کے خلاف تحریک انصاف کے رہنما کی درخواست پر عائشہ گلالئی سے جواب طلب کرلیا۔تحریک انصاف کی منحرف رکن عائشہ گلالئی نے عمران خان پر الزام عائد کیا تھا کہ ان کے ہوتے ہوئے تحریک انصاف میں خواتین کی عزت محفوظ نہیں تاہم پارٹی قیادت کی جانب سے تمام الزامات کی تردید کی گئی۔تحریک انصاف کے رہنما جاوید بدر نے لاہور کی سیشن کورٹ میں درخواست دائر کی جس میں مؤقف اختیار کیا گیا
کہ عائشہ گلالئی نے تحریک انصاف کی قیادت پر بے بنیاد الزامات لگائے۔درخواست میں استدعا کی گئی کہ عدالت عائشہ گلالئی کو الزامات پر معافی مانگنے اور 30 ملین روپے ہرجانہ ادا کرنے کا حکم دے۔عدالت نے درخواست قابل سماعت قرار دیتے ہوئے عائشہ گلالئی سے 16 اکتوبر تک جواب طلب کرلیا۔علاوہ ازیں پاکستان تحریک انصاف کے چیئرمین عمران خان لندن چلے گئے ۔ ہفتہ کو پاکستان تحریک انصاف کے چیئرمین عمران خان بے نظیربھٹو انٹرنیشنل ائیرپورٹ سے پی آئی اے کی پروازپرلندن روانہ ہوئے۔ عمران خان کے صاحبزادے سلمان ، قاسم اور پی ٹی آئی رہنماء عثمان ڈار بھی ہمراہ تھے۔ عمران خان اورعثمان ڈارایک ہفتے کے دورے پرلندن گئے ہیں تاہم دورے کے دوران پارٹی رہنماؤں سے بھی ملاقاتیں ہوں گی۔