اسلام آباد (این این آئی)طیبہ تشدد کیس کی مرکزی ملزم سابق جج راجہ خرم کی اہلیہ ماہین ظفر نے وزارت داخلہ کو دی گئی تحریری درخواست میں موقف اختیار کیا ہے کہ ایک مافیا کا سرغنہ ان کے اور ان کے شوہر کے خلاف سازش کر رہا ہے۔ایڈیشنل ڈسٹرکٹ اینڈ سیشن جج راجا خرم کی اہلیہ ماہین ظفر کی جانب سے وزارت داخلہ کو دی گئی درخواست میں موقف اختیار کیا گیا کہ جڑواں شہروں سے تعلق رکھنے والا ایک بااثر قبضہ مافیا کا سرغنہ
اس سازش میں ملوث ہے ۔درخواست میں کہا گیا کہ قبضہ مافیا نے من گھڑت کہانی کے ذریعے جج راجہ خرم علی خان کی کردار کشی کی اور طیبہ پر تشدد کو سوشل میڈیا کے ذریعے وائرل کرکے منفی پروپیگنڈہ کیا گیا۔ماہین ظفر کا مزید کہنا تھا کہ میں اور میرے شوہر طیبہ کو اپنے گھر کا فرد سمجھتے تھے لہذا ہم اس پر تشدد کا سوچ بھی نہیں سکتے’۔ذرائع کے مطابق وزیر داخلہ کی جانب سے درخواست کو کارروائی کیلئے پولیس کو بھجوا دیا گیا۔
