اسلام آباد (مانیٹرنگ ڈیسک) وزیر اعلیٰ کے پی کے پرویز خٹک نے کہا ہے انشا اللہ عمران خان پاکستان کے اگلے وزیر اعظم ہونگے۔ انہوں نے عمران خان کی دوسری شادی کے حوالے سےبات کرتے ہوئے کہا کہ ہر شخص کی ایک ذاتی زندگی ہوتی ہے جس پر بات اور تنقید کرنے کا حق کسی کو بھی نہیں اسی طرح عمران خان کی بھی ذاتی زندگی ہے جس پر تنقید کرنے کا حق کسی بھی شخص کو حاصل نہیں ۔
انہوں نے کہا کہ اگر عمران خان کی دوسری شادی نہیں چل سکی تو انہیں تیسری شادی کرنے کا پورا پورا شرعی حق حاصل ہے اور یہ کوئی جرم نہیں ۔ وزیر اعلیٰ کے پی کے کا کہنا تھا کہ اللہ کی ہم پر رحمت ہو گی اور انشا اللہ عمران خان پاکستان کے اگلے وزیر اعظم ہونگے۔ ان کا کہنا تھا کہ خیبر پختونخواہ ملک کا محفوظ ترین صوبہ ہے۔ آرمی چیف کی کوششوں کو سراہتے ہوئے وزیر اعلیٰ پرویز خٹک نے کہا کہ آرمی چیف کی کوششوں ہی سے صوبے میں دہشتگردی کا خاتمہ ہوا امید کرتے ہیںکہ نئے آنے والے آرمی چیف بھی ملک و قوم کیلئے بہترین ثابت ہونگے ۔

جبکہ اس سے قبل وزیراعلیٰ خیبرپختونخواہ پرویز خٹک نے کہا ہے کہ پانامہ لیکس پر 6 ماہ پہلے تک وزیراعظم کچھ اور کہتے تھے اور اب کچھ اور کہہ رہے ہیں، آئینی طور پر اپنا حق مانگنا بھی آتا ہے اور لینا بھی جانتے ہیں۔ایک انٹرویومیں وزیراعلی خیبرپختونخوا پرویز خٹک نے کہا کہ کرپشن کا ہم نہیں کہہ رہے پانامہ لیکس کہہ رہی ہے کہ کرپشن ہوئی ہے، انہوں نے کہا کہ 6 ماہ پہلے تک وزیراعظم کچھ اور کہتے تھے اب کچھ اور کہہ رہے ہیں، اب اچانک شہزادے کہاں سے آ گئے ہیں،

انہوں نے کہا کہ سی پیک پر وزیراعظم جلد سیاسی رہنماؤں کو بلائیں ورنہ ملک کو نقصان ہو گا۔انہوں نے کہا کہ وفاق سے فنڈز کی منتقلی ست روی کا شکار ہے ، آئینی طور پر اپنا حق مانگنا بھی آتا ہے اور لینا بھی جانتے ہیں۔