کراچی(مانیٹرنگ ڈیسک) سندھ اسمبلی میں مچھروں نے اراکین اسمبلی کو توجہ دلانے پر مجبور کردیا۔سپیکر سندھ اسمبلی اور ایم کیوایم کے ڈاکٹر ظفر کمالی میں مچھروں پر دلچسپ جملوں کا تبادلہ ہوا۔ایک نجی ٹی وی کے مطابق سندھ اسمبلی میں جمعہ کےروز کارروائی کے دوران بن بلایا مہمان ”مچھر” زیرِ بحث رہا، عوامی مسائل پر توجہ دلاتے ہوئے اراکینِ اسمبلی مچھر سے پریشان رہے اور سپیکر سے شکایت کر دی۔
ایم کیو ایم پاکستان کے رکنِ صوبائی اسمبلی ڈاکٹر ظفرکمالی محکمہ خوراک کی لیبارٹری پرتوجہ دلاؤ نوٹس پر بات کر رہے تھے کہ مچھر کے بار بار تنگ کرنے پر بات کا رُخ مچھر کی طرف موڑ دیا اور اسپیکر صوبائی اسمبلی سے مچھروں کی موجودگی کی شکایت کر دی۔توجہ دلاؤ نوٹس پر سپیکر سندھ اسمبلی آغا سراج درانی نے بھی ڈاکٹر ظفر کمالی کو خوب لقمہ دیا، کہنے لگے کہ ابھی اپرے نہیں کرواسکتے ورنہ سب بے ہوش ہوجائیں گے۔صوبائی اسمبلی وزیر نثار کھوڑو نے ڈاکٹر ظفر کمالی کو تسلی دیتے ہوئے کہا کہ فکر نہ کریں یہ عام سا مچھر ہے کوئی ڈینگی مچھر نہیں ہے اس لیے بے فکر ہو جائیں۔سپیکر صوبائی اسمبلی نے مزید چٹکلہ چھوڑا کہ لگتاہے یہ آپ کا کوئی پسندیدہ مچھر ہے جو آپ کے ساتھ ساتھ سیشن میں شریک ہوا ہے۔
