لاہور(این این آئی)قومی ائیر لائنز کی پریمیئر سروس کی ائیر ہوسٹس کو لندن سے قیمتی موبائل فون اسمگل کرنے پر نوکری سے فارغ کر دیا گیا ، ائیر ہوسٹس مہوش نے دوران تفتیش اعتراف جرم بھی کر لیا ۔ائیرپورٹ ذرائع کے مطابق لاہور کے علامہ اقبال انٹرنیشنل ائیرپورٹ پر قومی ائیرلائنز کی ائیرہوسٹس مہوش جب پریمئیر سروس کی پرواز پی کے 758 کے ذریعے لندن سے لاہور پہنچی تو اطلاع ملنے پر اس کے قبضے سے لاکھوں روپے مالیت کے 6 قیمتی آئی فون جبکہ 1 قیمتی سام سنگ موبائل فون برآمد ہوا ۔ائیر پورٹ ذرائع کے مطابق حراست میں لیے جانے کے بعد دوران تفتیش ائیر ہوسٹس مہوش نے کسٹمز حکام کے سامنے اعتراف کیا کہ اس نے سوچتے سمجھتے ہوئے سمگلنگ کی کوشش کی ہے اور وہ براہ راست خود اس میں ملوث ہے۔اعتراف جرم پر پی آئی اے حکام نے ائیر ہوسٹس مہوش کو نوکری سے نکال دیا جس کے احکامات ڈپٹی جنرل مینیجر ہیومن ریسورس برائے فلائیٹ سروسز عبدالحق ہالپوتہ نے جاری کیے ہیں۔