لاہور(این این آئی )سنی اتحاد کونسل پاکستان کے چیئرمین صاحبزادہ حامد رضا نے کہا ہے کہ عمرا ن خان کے مطالبات جائز اور طریقہ احتجاج جمہوری ہے،عوام اور حکومت میں فاصلے بڑھتے جارہے ہیں، کرپشن کے خلاف احتجاج کو روکنے کیلئے سب چور اکھٹے ہورہے ہیں،موروثی اور خاندانی سیاست نے حقیقی جمہوریت کا راستہ روک رکھا ہے۔ ان خیالات کا اظہار انہوں نے جامعہ انوا ر مدینہ میں سنی اتحاد کونسل ضلع لاہور کے ورکرز کنونشن سے خطاب کرتے ہوئے کیا۔ کنونشن سے مفتی محمد حبیب قادری، ڈاکٹر مفتی محمد کریم خان، صاحبزادہ معاذ المصطفیٰ، راؤ حسیب احمد اور علامہ جاوید نوری نے بھی خطاب کیا۔ صاحبزادہ حامد رضا نے مزید کہا کہ جمہوریت نے عوام کو احتجاج کا حق دیتی ہے۔ 65خاندان 65سالوں سے عوام اور ملک پر مسلط ہیں۔ بیڈ گورننس نے سرکاری ادارے مفلوج کردیئے ہیں۔ اپوزیشن کے احتجاج سے جمہوریت نہیں کرپٹ حکومت ڈی ریل ہو گی۔ پاک فوج نے بے مثال قربانیاں دیکر قوم کے دل جیتے ہیں۔ صاحبزادہ حامد رضا کا مزید کہنا تھا کہ عالمی برادری بھارت سے جنگی جرائم کا جواب مانگے۔ بھارتی فوج کشمیریوں کے گھر ، سکول ، املاک اور فصلیں تباہ کررہی ہے۔ مسلم حکمران شام اور یمن میں امن کیلئے اپنا کردار ادا کریں۔ امت مسلمہ کو آپس میں لڑا کر کمزورکیا جارہا ہے۔ وحد ت امت ہی مسلمانوں کے تمام مسائل کا حل ہے۔ حکومت بھارتی کی ریاستی دہشتگردی کو عالمی سطح پر بے نقاب کرے۔