اسلام آباد(مانیٹرنگ ڈیسک) کراچی میں رینجرز نے کارروائی کرتے ہوئے محرم الحرام میں دہشت گردی کا خوفناک منصوبہ ناکام بنادیا۔ ایک خودکش بمبار کو اس کے دو سہولت کاروں سمیت گرفتار کرلیا گیا۔ تفصیلات کے مطابق کراچی کی حفاظت کے لیے ہر دم تیار رینجرز نے دہشت گردی کے ایک اور بڑے منصوبے کو ناکام بنا دیا۔ محرم الحرام میں دہشت گردوں نے خودکش دھماکے کے ذریعے بڑے پیمانے پر جانی اور مالی نقصان کی منصوبہ بندی کی تھی۔ذرائع کے مطابق خفیہ اطلاع پر رینجرز نے اورنگی میں کارروائی کی اور خودکش حملہ آور کو گرفتار کر لیا۔ کارروائی کے دوران گرفتار خودکش حملہ آور کے دو سہولت کاروں کو بھی دھرلیا گیا۔ حساس ادارے سندھ میں محرم الحرام کے دوران دہشت گردی کی کارروائی کے حوالے سے الرٹ جاری کر چکے ہیں جس کے بعد صوبے میں رینجرز سمیت دیگر قانون نافذ کرنے والے پہلے سے زیادہ متحرک ہیں۔