لاہور ( این این آئی)نئے اسلامی سال 1438ھ اور محرم الحرام کا چاند دیکھنے کے لئے رویت ہلال کمیٹی کا اجلاس کل ( اتوار ) 2اکتوبر بمطابق 29ذی الحج کو طلب کر لیا گیا ۔مرکزی رویت ہلال کمیٹی کا اجلاس مرکزی چیئر مین مفتی منیب الرحمن کی زیر صدارت کراچی میں منعقد ہو گا جبکہ ذونل رویت ہلال کمیٹیوں کے اجلاس وقت مقررہ پر ان کے مقررہ مقامات پر منعقد ہوں گے جن میں نئے اسلامی سال اور محرم الحرام کا چاند نظر آنے یا نہ آنے کا فیصلہ کیا جائے گا۔ ماہر فلکیات نے پیشگوئی کی ہے کہ نئے اسلامی سال اور محرم الحرام 1438ھ کا چاند 2اکتوبر بروز اتوار بمطابق 29ذی الحج 1437ھ کی شام نظر آئے گا جبکہ یکم محرم الحرام 1438ھ پیر 3اکتوبر کو ہو گی نیز یوم عاشور 10محرم الحرام بروز بدھ بمطابق 12اکتوبر کو ہو گا۔