لاہور ( این این آئی) لاہور ہائیکورٹ نے غیر قانونی طور پر رقم بیرون ملک بھیجنے پر64 سیاستدانوں اور معروف شخصیات کے خلاف کارروائی کے لئے متفرق ترمیمی پیٹشن دائر کرنے کی ہدایت کر دی۔ گزشتہ روز لاہور ہائیکورٹ کے جسٹس مامون رشید شیخ نے کیس کی سماعت شروع کی تو درخواست گزار بیرسٹر جاوید اقبال جعفری کی جانب سے موقف اختیار کیا گیا کہ نواز شریف ،شہباز شریف،حمزہ شہباز ، شاہد خاقان عباسی ، خواجہ شریف ، رانا تنویر ، ایاز صادق ، اسحاق ڈار ، جاوید ہاشمی ، عمران خان ، چوہدری شجاعت حسین، پرویز الٰہی ، فاروق ستار،نجم سیٹھی،میاں منشاء،عاصمہ جہانگیراور شیخ رشید سمیت 64سیاستدانوں اور معروف شخصیات نے تین سو ارب ڈالر غیر قانونی طور پر بیرون ملک منتقل کئے اور قومی خزانے کو ناقابل تلافی نقصان پہنچایا۔ نواز شریف کے صاحبزادوں نے برطانیہ میں149جائیدادیں خریدیں جبکہ درخواست میں فریق بنائے گئے تمام سیاستدانوں نے بیرون ملک اثاثے بنائے ۔ ان سیاستدانوں کی طرف سے بیرون ملک بینکوں میں رکھے گئے پیسے وطن واپس لا کر ملک کی حالت تبدیل کی جا سکتی ہے اور حقیقی انقلاب برپا کیا جا سکتا ہے۔لہٰذا معزز عدالت سے استدعا ہے کہ 64سیاست دانوں اور معروف شخصیات کو ذاتی حیثیت میں عدالت میں طلب کیا جائے۔ عدالت نے ہاتھ سے لکھی ہوئی متفرق درخواست کی بجائے ترمیمی پٹیشن دائر کرنے کی ہدایت کرتے ہوئے کیس کی سماعت ملتوی کر دی۔