لاہور ( این این آئی)سربراہ سنی تحریک ثروت اعجازقادری کی اپیل پراہلسنّت کی تیس مذہبی وسیاسی جماعتوں نے تحریک آزادئ کشمیر کی حمایت کیلئے ملک گیر ’’یوم حمایت حریت‘‘ منایا۔جمعہ کے ملک گیراجتماعات میں مظلوم کشمیریوں پربھارتی مظالم اوربربریت کے خلاف مذمتی قراردادیں منظور کی گئیں اور بھارتی دھمکیوں اورممکنہ جارحیت کے خلاف افواج پاکستان سے مکمل اظہاریکجہتی اوران کیساتھ کھڑے ہونے کااعلان کیاگیا۔ اس موقع پر مختلف اجتماعات سے خطاب کرتے ہوئے سنی تحریک کے رہنماؤں علامہ مجاہد عبدالرسول خان ، سردار محمد طاہر ڈوگر ، شیخ محمد نواز قادری، علامہ سرفراز سیالوی ، قاری ریاض ہزاروی نے کہا ہے کہ بھارت خطے کو خون میں نہلانا چاہتاہے،ہندوستانی حکومت مقبوضہ کشمیر میں بھارتی فوج کی ناکامی پر بوکھلاہٹ کا شکارہوچکی ہے، بھارت کوئی بھی غلطی کرنے سے قبل یہ سوچ لے کہ دنیا کی واحد ہندوریاست صفحہ ہستی سے مٹ جائے گی ، پاکستانی قوم بھارتی گیدر ببھکیوں سے مرعوب ہونے والی نہیں،پاکستان کی طرف اٹھنے والی میلی آنکھ کو پھوڑ دیں گے،،جنرل راحیل شریف کا کورکمانڈرزکانفرنس کے بعد جاری بیان قوم کی امنگوں کی عکاسی کرتاہے فوج پوری طرح چوکس ہے آپریشن ضرب عضب کی کامیابی سے فوج کا مورال بہت بلند ہے قوم اپنی فوج کی پشت پناہی کرتی رہی ہے اورآئندہ بھی شانہ بشانہ کھڑی ہوگی،یوم حمایت حریت کے سلسلے میں اسلام آباد،لاہور،راولپنڈی، کراچی،پشاور،کوئٹہ، مظفرآباد، فیصل آباد، ملتان ، گوجرانوالہ، سیالکوٹ، گجرات، سرگودھا، بہاولپور، جھنگ، اوکاڑہ،حیدرآباد، سکھر، میرپورخاص، لاڑکانہ،ایبٹ آباد، ڈیرہ اسماعیل خان، کوہاٹ، چارسدہ، نوشہرہ، خضدار، لسبیلہ، نصیرآبادسمیت دیگرکئی شیروں میں بھی تحریک آزادئ کشمیر کی حمایت میں اجتماعات منعقدکیے گئے ۔