اسلام آباد (این این آئی) تحریک انصاف کے سیکرٹری جنرل جہانگیرترین نے کہاہے کہ تمام توجہ رائیونڈ مارچ پر ہے ٗ سیف اللہ نیازی نے استعفیٰ دیا نہ ان سے کوئی اختلاف ہے ٗپی ٹی آئی کا یوتھ ونگ کو تحلیل نہیں کیا ٗ پوسٹر اور بینر بنوانے والے (ن )لیگ کی ایماء پر کام کررہے ہیں ۔ذرائع کے مطابق تحریک انصاف یوتھ ونگ کے وفد نے جہانگیرترین سے ملاقات کی،سیکرٹری جنرل پی ٹی آئی نے کہاکہ وہ غلط فہمیاں دورکرناچاہتے ہیں ٗیوتھ ونگ کو تحلیل نہیں کیا ۔تمام ونگز سے متعلق فیصلے مشاورت سے کئے جاتے ہیں ٗجو خبریں اچھالی جارہی ہیں اور جولوگ اختلاف باہر لے کر آرہے ہیں ٗوہ ن لیگ کے ایجنڈے پر ہیں، مسلم لیگ ن کا عمران خان کے بعد ہدف میں ہوں۔جہانگیر ترین نے کہا کہ ان کا ایڈیشنل سیکرٹری جنرل سیف اللہ نیازی کیساتھ کوئی اختلاف نہیں ٗ میری وجہ سے انہوں نے استعفیٰ نہیں دیا۔جہانگیرترین نے کہاکہ ان کی تمام ترتوجہ رائیونڈ مار چ پر ہے ٗا س میں تحریک انصاف کے تمام ونگز آئیں گے ۔ میڈیا سے گفتگو کرتے ہوئے جہانگیرترین نے کہا کہ پی ٹی آئی کے یوتھ ونگ کو ڈی سنٹرا لائز کر رہے ہیں جس کا مقصد یوتھ ونگ کا مرکزی قیادت سے نچلی سطح تک رابطہ رکھنا ہے ۔انہوں نے کہا کہ تحریک انصاف ایک فیملی کی طرح ہے ،ہمارے اندرونی اختلافات باہر لانے والے ن لیگ کے ایجنڈے پر ہیں ،تحریک انصاف میں کوئی اختلاف نہیں ،میڈ یا پر چلنے والی خبریں ن لیگ کے موٹو گروپ کی کارستانی ہے ۔انہوں نے کہاکہ عمران خان کے بعد ن لیگ کے نشانے پر سب سے زیادہ میں ہوں ٗن لیگ کے اشارے پر پارٹی مخالف باتیں ہو رہی ہیں ۔جہانگیر ترین نے کہا کہ 30ستمبر کے رائیونڈ مارچ میں بتائیں گے تحریک انصاف کی طاقت کیا ہے ،رائیونڈ میں تاریخی شو کریں گے ۔انہوں نے کہا کہ عمران خان ،شاہ محمود قریشی اور مجھ سمیت تمام قیادت لوگوں کو حرکت میں لائے گی ۔