لاہور( این این آئی)پنجاب حکومت کے ترجمان سید زعیم حسین قادری کی پریس کانفرنس بد نظمی کا شکار ہو گئی جس کے باعث زعیم قادری پریس کانفرنس ادھوری چھوڑ کر واپس چلے گئے ۔ زعیم حسین قادری گزشتہ روز دو درجن سے زائد نواز جانثار فورس کے کارکنوں کے ہمراہ پریس کلب میں پریس کانفرنس پہنچے تاہم اس دوران وہاں موجود گلو بٹ کے ہم شکل عبد الغنی بٹ نے صحافیوں سے بد تمیزی کی جس سے ماحول میں تلخی پیدا ہو گئی۔ اس دوران نواز جانثار فورس کے کارکنوں نے عبد الغنی بٹ کو تشدد کا نشانہ بناتے ہوئے پریس کانفرنس ہال سے باہر نکال دیا ۔ عبد الغنی بٹ نے پریس کلب کے مرکزی دروازے پر کھڑے لیگی کارکنوں کی ہمدردیاں حاصل کرنے کے لئے انہیں پریس کلب کے اندر لانے کی کوشش کی تاہم پریس کلب کی انتظامیہ نے پہلے ہی زیادہ تعداد میں کارکنوں کے اندر موجود ہونے پر اسے اندر جانے سے روکدیا جس سے ایک مرتبہ پھر ہنگامہ کھڑا ہو گیا ۔اس دوران پریس کانفرنس ہال کے کے اندر بھی شور شرابہ جاری رہا جس کے باعث زعیم قادری پریس کانفرنس ادھوری چھوڑ کر واپس چلے گئے۔ نواز جانثار فورس کے کارکنوں نے باہر آ کر ایک مرتبہ پھر عبد الغنی بٹ کو تشدد کا نشانہ بنایا تاہم اس دوران گڑھی شاہو پولیس کے اہلکار بھی پہنچ گئی جو اسے اپنے ساتھ گاڑی میں بٹھا کرلے گئے۔ زعیم قادری کا کہنا تھاکہ جس شخص نے بد نظمی کی میں اسے نہیں جانتا ، اس نے جان بوجھ کر پریس کانفرنس خراب کرنے کی کوشش اس کی مکمل تحقیقات کی جائیں گی۔