لاہو ر(این این آئی )صوبائی وزیر قانون وپا رلیمانی امورراناثناء اللہ خاں نے کہا ہے کہ طاہر القادری اپنے فارن ایڈ اور عمران خان اپنے سسرالی ایجنڈے میں ناکام ہوں گے ،تمام تر سازشوں کے باوجود پاک چین اقتصاری راہداری منصوبہ بروقت مکمل ہو گا ، سانحہ ماڈل ٹاؤن کیس کی سماعت جاری ہے ،عدالت جو بھی فیصلہ کر ے گی وہی انصاف اور وہی قصاص ہو گا،اورنج لائن ٹرین منصوبہ بروقت مکمل ہو گا ،میرا نہیں خیال کہ سپریم کورٹ اس عوامی منصوبے کے خلاف فیصلہ دے گی ۔ایک انٹرویو میں رانا ثناء اللہ نے کہا کہ شیخ رشید پاکستانی سیاست کا گھٹیا ترین کردار ہے ، اس کی سوچ بھی ہمیشہ منفی رہی ہے ،پہلے اس نے ہر جگہ میاں نواز شریف کے نام پر کامیابی حاصل کی اور آج کل پی ٹی آئی کے کندھوں پر سوار ہے اس کی اپنی کوئی سیاست نہیں ، اس کی پاکستان مسلم لیگ (ن )سے مخالفت کی وجہ ہی یہی ہے کہ یہ (ن) لیگ میں شمولیت کیلئے ترلے منتیں کر تا رہااور ناکامی پر مخالفت میں کھڑا ہوگیا ۔ انہوں نے کہا کہ طاہر القادری کے احتجاجوں اورریلیوں کا مقصد صرف اور صر ف پیسہ کمانا ہے کیونکہ وہ ریلیوں اور احتجاجوں کے ذریعے ترقیاتی کاموں میں رکاوٹیں ڈالتے ہیں اورملک دشمنوں سے اس کے بدلے بھاری رقوم وصول کرتے ہیں، اب بھی طاہر القادری لندن سے دوبارہ پاکستان اس لیے آئے ہیں کیونکہ انہیں بھارت سے دوسری قسط موصول ہوچکی ہے ،جو شخص ملک کے دشمن سے پیسہ لے کر ریلیاں نکالے گاوہ ملک سے مخلص کیسے ہو سکتا ہے ، عمران خان اور قادری ملک دشمن قوتوں کے ایجنڈے پر عمل پیرا ہیں لیکن وہ اس میں بری طرح ناکام ہوں گے۔ انشاء اللہ پاک چین اقتصادی راہداری کامنصوبہ بروقت مکمل ہو گا اورسازشیں کرنیوالے ناکام ہو جائیں گے۔ایک سوال کے جواب میں انہوں نے کہا کہ سانحہ ما ڈل ٹاؤن کیس کی سماعت عدالت میں جاری ہے ،عدالت جو بھی فیصلہ کر ے گی وہی انصاف اور وہی قصاص ہو گا۔ انہوں نے کہا کہ اورنج لائن ٹرین منصوبہ بروقت مکمل ہو گا ،میرا نہیں خیال کہ سپریم کورٹ اس کے خلاف فیصلہ دے گی کیونکہ یہ عوامی منصوبہ اپنی افادیت ، بچت ، ماحولیاتی طورپر محفوظ ، ٹرانسپورٹ اور روزگار کے ان گنت مواقع پیدا کرنے کے باعث اپنی مثال آپ ہو گا،اس میں اڑھائی لاکھ افراد یومیہ سفر کریں گے اور اڑھائی گھنٹوں کا سفر 45منٹ میں طے ہوگا،ایک غریب دشمن طبقہ اس کے خلاف سیخ پا ہے کیونکہ وہ غرباء کو اس بین الاقوامی سہولت سے محروم رکھنا چاہتا ہے ، امید ہے کہ اس طبقے کے منفی خواب پو رے نہیں ہو سکیں گے