لاہور(این این آئی)پاکستان تحریک انصاف کے جلسوں میں ڈی جے ولی سنز کا ساؤنڈ سسٹم سے بھرا ٹرک لاپتا ہوگیا۔نجی ٹی وی کے مطابق ڈی جے ولی سنز کی جانب سے تھانہ سٹی جہلم میں اندراج مقدمہ کیلئے درخواست جمع کرائی گئی ٗ درخواست گزار نے بتایا ہے کہ پی ٹی آئی کے 24 اگست کو جہلم میں ہونے والے جلسے میں شرکا کا لہو گرمانے کیلئے اتوار اور پیر کی درمیانی شب ساؤنڈ سسٹم سے بھرا ہوا ٹرک رات کو 2 بجے لاہور سے جہلم کیلئے روانہ کیا گیا تھا۔ لاہور سے روانہ ہونے کے بعد ٹرک مقررہ جگہ پر نہیں پہنچا اور پر اسرار طور پر لاپتہ ہوگیا ٗ عملے سے بھی کوئی رابطہ نہیں ہورہا۔واضح رہے کہ پی ٹی آئی کی جانب سے تحریک احتساب کے آغاز پر اسلام آباد میں ریلی نکالی گئی تھی جس کے دوران جلسہ شروع ہونے سے تھوڑی ہی دیر پہلے ساؤنڈ سسٹم کے ٹرک میں آگ لگ گئی تھی ۔ ٹرک میں آگ لگنے سے ساؤنڈ سسٹم مکمل طور پر جل گیا تھا جس سے 50 لاکھ روپے کا نقصان ہوا تھا۔