لاہور( مانیٹرنگ )لاہور کے علاقہ کاہنہ میں باپ نے غیرت کے نام پر فائرنگ کر کے بیٹی اور داماد سمیت تین افراد کو قتل کر دیا ، ملزم نے خود تھانے پیش ہو کر گرفتاری دیدی ۔ بتایا گیا ہے کہ کاہنہ کے علاقے عبداللہ ٹاؤن میں کرامت عرف بھولا نامی نوجوان اشرف کے گھر میں رہتا تھا ۔ اشرف کی بیٹی صباء اور کرامت نے ایک سال قبل پسند کی شادی کر لی تھی اور ان کا دو ماہ کا بیٹا بھی تھا ۔ بتایاگیا ہے کہ اشرف کے کہنے پر اس کا بھائی اپنے بھتیجی صباء اور داما کرامت کو منا کر گھر واپس لے آیا تھا ۔
گزشتہ رات اشرف نے پہلے اپنے داما د کرامت کے سر پر اینٹ ماری اور اسکے بعد اس پر فائرنگ کر دی جس سے وہ موقع پر ہی دم توڑ گیا۔ اشرف نے خاوند کو بچانے کے لئے آنے والی اپنی بیٹی صباء پر بھی فائرنگ کر دی جس سے وہ بھی موقع پر ہی دم توڑ گئی ۔ بتایا گیا ہے کہ اشرف نے بیٹی کی پسند کی شادی میں ساتھ دینے والے اکرام نامی شخص کے گھر گیا اور اسے باہر بلا کر اسے بھی فائرنگ کر کے قتل کر دیا ۔ بعد ازاں ملزم نے خود کو پولیس کے حوالے کر دیا ۔پولیس کے مطابق ملزم اشرف سکیورٹی گارڈ ہے۔ قتل کی تہری واردات کے بعد علاقے میں فضاء سوگوار ہو گئی ہے ۔