اسلام آباد (این این آئی) وفاقی وزیر داخلہ چودھری نثار علی خان نے محمد منشاء کی ڈیپورٹیشن کے معاملے پر فرانس کے غیر مناسب رویے پر سخت اور اصولی موقف اپناتے ہوئے کہا ہے کہ اس معاملے پر کسی کی دھمکی میں آئے بغیر اپنے قانون کے مطابق فیصلہ کرینگے ۔ایک بیان میں وفاقی وزیر داخلہ چودھری نثار علی خان نے کہا کہ پاکستان کسی بھی دھمکی میں آئے بغیر اپنے قانون کے مطابق فیصلہ کریگا، یاد رہے کہ محمد منشاء گزشتہ کئی سالوں سے فرانس میں مقیم تھا جس پر سنگین نوعیت کے اخلاقی جرائم میں ملوث ہونے کا الزام ہے۔فرانسیسی محکمہ داخلہ نے محمد منشاء کو پاکستان ڈیپورٹ کرنے کی غرض سے پاکستانی سفیر کو یہ پیغام دیا کہ محمد منشاء کو دو گھنٹوں میں سفری دستاویزات کا اجراء کیا جائے ورنہ دونوں ملکوں کے تعلقات متاثر ہو سکتے ہیں ۔پاکستانی سفیر نے اسلام آباد میں وزراتِ داخلہ سے رابطہ کیا اور فرانسیسی محکمہ داخلہ کے موقف سے آگاہ کیا۔جب صورتحال وزیرِداخلہ چوہدری نثار علی خان کے علم میں آئی تو انہوں نے سخت موقف اختیار کرتے ہوئے کہ کسی غیر تصدیق شدہ شخص کو کسی صورت بھی پاکستانی پاسپورٹ کا اجراء نہیں کیا جائے گا اور فرانسیسی وزارت کا رویہ نہایت غیر مناسب اور سفارتی آداب کے منافی ہے۔ انہوں نے کہا کہ پاکستان کسی بھی دھمکی میں آئے بغیر اپنے قانون کے مطابق فیصلہ کرے گا۔ انہوں نے کہا کہ اگر محمد منشاء کی ڈیپورٹیشن مطلوب ہے تو پاکستان کے قانون اور مروجہ طریقہ کار کے مطابق اس کے کوائف حکومت پاکستان کو مہیا کیے جائیں تاکہ اس کی شہریت کی تصدیق کی جا سکے۔ وزیرِداخلہ نے کہا کہ محمد منشاء کو لینے کا فیصلہ اسکی شہریت کی بنیاد پر کیا جائے گا۔ انہوں نے واضح کیا کہ محمد منشاء کے معاملے میں اگر حکومت فرانس نے پاکستانی قوانین کی خلاف ورزی کرنے کی کوشش کی تو نہ صرف محمد منشاء کو اسی فلائٹ سے واپس بھیج دیا جائے گا بلکہ محمد منشاء کو غیر قانونی طور پر پاکستان لانے والی ائیر لائنز کو بھی جرمانہ کیا جائیگا۔