لاہور ( این این آئی) دہشت گردوں کی قید سے علی حیدر گیلانی کی بحفاظت بازیابی کی منت اتارنے کی خاطر گیلانی خاندان کے 18افراد عمرہ ادائیگی کے لیے لاہور سے جدہ روانہ ہو گئے۔سابق وزیر اعظم سید یوسف رضا گیلانی کے خاندان کے اٹھارہ افراد عمرہ ادائیگی کے لیے ایمریٹس کی پرواز625 کے ذریعے لاہور سے براستہ دبئی جدہ کے لیے روانہ ہوئے ۔ سابق وزیر اعظم سید یوسف رضا گیلانی کے بیٹے سید علی حیدر گیلانی کی طالبان کی قید سے بازیابی کے بعد تمام اہلخانہ علی حیدر گیلانی کی رہائی کی منت اتارنے کے لیے حرم پاک روانہ ہوئے ہیں جو مکہ مکرمہ میں بیت اللہ سمیت مدینہ منورہ میں روضہ رسول صلی اللہ علیہ و آلہ وسلم پر نوافل ادا کریں گے۔گیلانی خاندان کی لاہور سے روانگی سے قبل سید علی حیدر گیلانی اور دیگر اہلخانہ خوشگوار موڈ میں دکھائی دیئے جن میں سابق وزیر اعظم سید یوسف رضا گیلانی کی اہلیہ فوزیہ گیلانی سمیت بیٹی فضہ گیلانی ، بیٹا عبدالقادر گیلانی، بیٹا علی موسی گیلانی، علی قاسم گیلانی، علی حیدر گیلانی اور پوتے پوتیاں اور نواسے نواسیاں شامل ہیں۔