اسلام آباد(این این آئی) وفاقی وزیر داخلہ چودھری نثار نے کہا ہے کہ افغان طالبان کے امیر ملا منصور کے ڈی این اے ٹیسٹ میں تصدیق کے بعد ہی اسکی موت کا اعلان کیا گیا۔اجلا س سے خطاب کرتے ہوئے چودھری نثار نے کہا کہ ملا منصور کی لاش قانونی کارروائی کے بعد افغانستان میں اس کے ورثا کے حوالے کردی گئی۔وزیر داخلہ نے کہا کہ ہم نے ملامنصور کے جعلی شناختی کارڈ کے اجراء میں معاونت کرنے والے تمام افسران کو گرفتار کرلیا ہے جس میں اسسٹنٹ کمشنر ٗرسالدار میجر ٗایف آئی اے اور نادرا کے ملازمین بھی شامل ہیں۔چودھری نثار نے کہا کہ صرف نادرا کے ملازمین ہی نہیں دیگر اعلی افسران بھی جعلی شناختی کارڈ بنوانے میں مددگار تھے اور یہ لوگ تصدیق کرنے والوں میں شامل تھے۔وزیر داخلہ کہا کہ ملامنصور کی دوسری بیوی کے شناختی کارڈ کے اجراء میں معاونت ایف آئی اے کے اہلکار نے کی تھی۔وزیر داخلہ نے کہاکہ امریکی ڈرون ایئر فورس کے ریڈار میں نہیں آیا جس کی وجہ سے نوشکی میں ہونے والے حملے کا بروقت پتا نہیں لگ سکا ٗسابق افغان طالبان امیر ملا اختر منصور کی لاش حوالگی ڈی این اے رپورٹ کی وجہ سے پاکستان میں موجود تھی اور ڈی این اے رپورٹ آنے کے بعد ان کی میت افغانستان بھجوادی گئی ہے جہاں لاش ان کے ورثا کے حوالے کردی گئی ہے ۔ چوہدری نثار علی خان نے کہاکہ جعلی کارڈز صرف پاکستان نہیں پوری دنیا کا مسئلہ ہیں اور پاکستان کیلئے یہ مسئلہ اس لئے ہیں کہ 40 لاکھ افغان مہاجرین، بنگلہ دیشی اور برما کے لوگ موجود ہیں۔انہوں نے کہا کہ پہلے کسی حکومت نے جعلی شناختی کارڈز کے مسئلے پر توجہ نہیں دی اور سابقہ دور حکومت میں صرف 529 شناختی کارڈز بلاک ہیں ٗ گزشتہ ڈھائی سال میں 2 لاکھ 50 ہزار شناختی کارڈ بلاک کئے گئے۔ انہوں نے کہا کہ اب نادرا میں ایمرجنسی نافذ کر دی ہے، کرپشن کے خلاف بلاتفریق کارروائی کی اور اب بھی کریں گے۔ انہوں نے چیئرمین نادرا کو ہدایت کی کہ ملک بھر کے لوگوں کے شناختی کارڈز کی دوبارہ تصدیق کا عمل شفاف ہونا چاہئے۔