اسلام آباد(نیوزڈیسک) وزیر اعظم اور وزیر داخلہ کے درمیان ایک بار پھر اپوزیشن لیڈر کو منانے کے معاملہ پر تنازعے کا امکان پیدا ہو گیا ہے۔چوہدری نثار علی خان اپنی پریس کانفرنس کے حرف بہ حرف پر ڈٹ گئے، اپوزیشن لیڈر سے رابطہ نہ کرنے کا دو ٹوک جواب دیکر وزیر اعظم کو مزید پریشانی میں مبتلا کر دیا ہے۔ ایک غیرسرکاری خبررساں ادارے آن لائن کے مطابق میڈیا کو ذرائع سے معلوم ہوا ہے کہ وزیر اعظم میاں محمد نواز شریف نے گزشتہ دنوں ہونیوالی ملاقات میں وفاقی وزیر داخلہ چوہدری نثار علی خان سے مسکراتے ہوئے کہا کہ آپ کی ایک پریس کانفرنس سے ہم پریشان ہو جاتے ہیں، اپوزیشن لیڈر سے متعلق جو باتیں کی گئیں وہ ماحول ایسا اب نہیں تھا، لہٰذا میری خواہش ہے کہ سید خورشید شاہ سے صلح کروائی جائے۔ وزیر اعظم کے دلچسپ مکالمے پر وفاقی وزیر داخلہ چوہدری نثار علی خان نے کہا کہ پارٹی قائد کا جو بھی حکم ہو گا تسلیم کیا جائے گا تاہم پریس کانفرنس کے حرف بہ حرف پر قائم ہوں اور ہو سکتا ہے کہ فون پر رابطہ بھی نہ کر پائوں۔ ذرائع نے بتایا کہ وفاقی وزیر اور وزیر اعظم کے درمیان طے پایا کہ آئندہ قومی اسمبلی اجلاس میں اپوزیشن لیڈر کی جانب سے کی جانے والی تقریر کا جواب وفاقی وزیر داخلہ نہیں دیں گے اور اس تشویش کو ٹھنڈا کرنے کیلئے خواجہ سعد رفیق یا وفاقی وزیر احسن اقبال ہی جواب دیں گے تاکہ معاملہ مزید الجھن کا شکار نہ ہو