کراچی(نیوزڈیسک) سندھ کے وزیربلدیات جام خان شورو نے الزام لگایا ہے کہ گٹربند کرنے کےلئے لائنوں میں بوریاں ڈالی گئیں، انہوں نے ویڈیو بنانے کاحکم دے دیا۔تفصیلات کے مطابق سندھ میں کراچی آپریشن اور اختیارات کی منتقلی کے بعد اب گٹروں پر سیاست شروع ہوگئی ہے۔ سائیں سرکارکو کراچی میں ابلتے گٹروں میں بھی سازش نظر آگئی۔صوبائی وزیربلدیات نے الزام لگایا ہے کہ بند ہونے والے گٹروں سے بوریاں ملی ہیں تحقیقات ہوگی کس نے بوریاں ڈالیں؟کراچی کی اہم شاہراہ ایم اے جناح روڈ پر تبت سینٹر کے قریب جہاں گٹر ابلنے پرشہریوں کو شدید مشکلات کا سامنا کرناپڑا۔ وہیں کئی سڑکوں پر ابلتے گٹر سائیں سرکار کی قیادت میں سرکاری اداروں کی کارکردگی پر سوالات اٹھارہے ہیں۔تبت سینٹر کے قریب ابلنے والے گٹر نے نہ صرف شہری بلکہ سیاسی ماحول بھی پراگندہ کردیا۔ عر صہ دراز سے اولڈ ایریا، گلبہار، نارتھ ناظم آباد، شاہ فیصل، ملیر اور اورنگی سمیت کئی علاقوں میں گٹر ابل رہے ہیں۔گندگی کے ڈھیروں سے وبائی امراض پھوٹنے کا بھی خدشہ ہے ایک طرف شہری ان مسائل سے لڑ رہے ہیں تو دوسری طرف اہم سیاسی جماعتیں اس معاملے پر ایک دوسرے کے خلاف کھڑی ہیں۔ایم کیو ایم کا موقف ہے کہ عوامی نمائندوں کو اختیارات کی منتقلی کے بغیر یہ مسائل حل نہیں ہوسکتے۔ بوسیدہ لائنیں ہیں یا پھر کوئی سازش ۔اس کا فیصلہ بھی تحقیقات کے بعد ہوہی جائے گا،لیکن تب تک عوام صرف سیاسی تماشا دیکھیں اور گندے پانی کو عبور کرنے کی مشقیں کریں۔