اسلام آباد(نیوزڈیسک)پنجاب کے بارہ اضلاع اور کراچی کے چھ اضلاع میں تیسرے مرحلے کے بلدیاتی انتخابات کے لیے انتخابی مہم روز و شور سے چلائی گئی. امیدواروں کی جانب سے ووٹرز کو اپنے طرف مائل کرنے کیلئے بلند و بانگ دعوے کیے گئے .متعلقہ شہروں میں انتخابی گہما گہمی عروج پر رہی ۔ جبکہ گلی ، محلوں اور سڑکوں پر پوسٹرز اور بینرز کی بھرمار ہے.پنجا ب کے بارہ اضلاع جن میں راولپنڈی ،ملتان ،ڈیرہ غازی خان ، بہاولپور، سیالکوٹ، ناروال ،خوشاب ،جھنگ ، راجن پور ، مظفر گڑھ ، لیہ،رحیم یار خان اور سندھ میں کراچی کےچھ اضلاع میں بلدیاتی انتخابات کےتیسرے مرحلے کیلئے پولنگ ہوگی. پنجاب میں سینتیس ہزارپانچ سوبتیس امیدواروں کے کاغذات نامزدگی منظورکیےگئے ان میں سے پانچ ہزار ایک سو چونسٹھ امیدواروں نے کاغذات نامزدگی واپس لیے. اس طرح کل اکتیس ہزار آٹھ سو اڑتالیس امیدوار مدمقابل ہیں .520 امیدوار بلامقابلہ کونسلر منتخب ہو چکے ہیں۔کراچی کےچھےاضلاع میں پانچ ہزار پانچ سو اڑتالیس امیدواروں کے درمیان مقابلہ ہوگاجبکہ اڑتالیس امیدوار پہلے ہی بلا مقابلہ منتخب ہو چکے ہیں .کراچی کے نئے تشکیل شدہ ضلع کورنگی شہر کو حساس ترین علاقہ قرار دیا گیا ہے.حکومت سندھ اور الیکشن کمیشن نے ضلع کورنگی کے تمام پولنگ اسٹیشنزکوحساس قرار دے دیا . کورنگی کراچی کا نو تشکیل شدہ ضلع ہے جس میں کورنگی ٹاؤن، لانڈھی ٹاؤن اورشاہ فیصل ٹاؤن کے علاقے شامل ہیں. دوسری جانب بلدیاتی الیکشن کے روزمتعلقہ اضلاع میں عام تعطیل ہوگی.