جیوانی( این این آئی) بلوچستان کے جیوانی ائیر پورٹ سے اغوا کئے گئے سول ایوی ایشن کے انجینئر محمود اللہ نیازی کی لاش مل گئی ہے جس کے بعد واقعہ میں مرنے والوں کی تعداد دو ہوگئی ہے ۔ انجینئر محمود اللہ نیازی کو دہشت گردوں نے جیوانی ایئر پورٹ پر حملے کے دوران اغوا کیا تھا ۔ سول ایوی ایشن کی تنصیبات پر رات گئے دہشت گردوں نے حملہ کیا تھا،جس میں ایک افسر خالد اللہ جان جاں بحق اور دوسرا افسر الطاف حسین زخمی ہوا جبکہ ایک اور انجینئر محمود اللہ نیازی کوا غوا کرلیا گیا تھا، جس کی لاش جیوانی کے قریب سے ملی ہے۔مغوی اہلکار کو کو فائرنگ کرکے قتل کیا گیا ہے۔ دہشت گردوں نے حملے میں طیاروں کی لینڈنگ میں مدد دینے والا وی او آر تباہ اور ریڈار سسٹم کو آگ لگادی تھی۔سول ایسوی ایشن کی تنصیبات پرحملے کامقدمہ جیوانی تھانے میں درج کر لیا گیا ہے۔ادھر جیوانی میں دہشت گردوں کے حملے میں زخمی ہونے والے انجینئر الطاف حسین کو کراچی کے نجی اسپتال منتقل کردیا گیا ہے ۔ جہاںڈاکٹرز ان کی جان بچانے کی کوششیں کر رہے ہیں۔ بتایاگیا ہے کہ ڈاکٹرز کی پانچ رکنی ٹیم انجینئر کی حالت کا جائزہ لے رہی ہے جبکہ زخمی انجینئر کے ایکسرے اور سیٹی اسکین بھی کرلئے گئے ہیں ، تاہم پیٹ میں لگنے والی گولی اب تک نہیں نکالی جاسکی ہے۔حملے کی ذمہ داری کالعدم بلوچ لبریشن آرمی نے قبول کرلی ہے۔