اسلام آباد(نیوز ڈیسک)سند ھ میں حکمران جماعت پاکستان پیپلز پارٹی کی اعلی قیادت نے ایک بار پھر وزیراعلی سندھ سید قائم علی شاہ کی تبدیلی کا امکان مسترد کردیا ہے اور سید قائم علی شاہ کی جگہ قومی اسمبلی میں اپوزیشن لیڈر سید خورشید شاہ کو وزیراعلی بنانے کی پارٹی کی سینٹرل ایگزیکٹیو کونسل(سی ای سی)میں سامنے آنے والی تجویز کو رد کردیا گیا ہے۔ ذمہ دار ذرائع نے بتایا کہ سی ای سی کی میٹنگ میں پیپلز پارٹی کی صوبائی حکومت کی کارکردگی کو مزید بہتر بنانے اور کرپشن کی شکایات کا ازالہ کرتے ہوئے گڈ گورننس کے حوالے سے وزیراعلی کی تبدیلی کی تجویز ایک سینئر رہنما نے پیش کی تھی جس پر کچھ رہنمائوں نے حکومتی کارکردگی میں بہتری لانے پر زور دیا تھا لیکن خورشید شاہ کو قائم علی شاہ کی جگہ وزیراعلی سندھ بنانے کی تجویز محض ایک انفرادی تجویز بن کر رہ گئی اور پارٹی قیادت نے وزیراعلی سندھ کی تبدیلی پر اتفاق نہیں کیا البتہ حکومتی کارکردگی کے حوالے سے بعض محکموں اور وزیروں کے بارے میں گڈگورننس کا تاثر پختہ کرنے پر اتفاق کیا گیا ہے۔ اس ر وز وزیراعلی سندھ سید قائم علی شاہ کو بھی پارٹی قیادت نے بعض امور کے حوالے سے ضروری ہدایات جاری کی ہیں۔ذرائع نے بتایا کہ سی ای سی کی میٹنگ کے فیصلوں کے بعد وزیراعلی سندھ قائم علی شاہ پہلے کی طرح تندہی اور اعتماد کے ساتھ حکومتی فیصلے کررہے ہیں اور صوبائی حکومتی امور میں ان کو فری ہینڈ حاصل ہے وہ قانون کے دائرہ کار کے اندر رہ کر ضروری فیصلے ہدایات اور احکامات جاری کرتے ہیں۔

مزید پڑھئے:گمشدہ چیزیں عورتیں جلد ی تلاش کر تی ہیں یامرد دلچسپ معلومات