کراچی(نیوزڈیسک)سندھ حکومت نے پاک فوج کی جانب سے زمین کے حصول کیلئے پندرہ سال پہلے دی گئی درخواست با لآخر منظور کرہی لی اور افواج پاکستان کے شہداء کے لیے نو ہزار چھ سو ایکڑ زمین دینے کا فیصلہ کرلیا۔تفصیلات کے مطابق دیر آید درست آید کے مصداق سائیں سرکار کی پندرہ سال بعد ہی سہی مگر پاک فوج کی درخواست کا خیال آہی گیاجو افواج پاکستان نے 2001 میں دی تھی۔درخواست میں مطالبہ کیا گیا تھا کہ حکومت افواج پاکستان کے 500شہداء کے لواحقین کو زرعی زمینیں فراہم کرے۔جب درخواست یادآئی تو وزیر اعلیٰ نے اتنی جلدی دکھائی کہ اپنے گھر میں فوراً اجلاس بلا لیا۔درخواست پر بحث ہوئی اورجھٹ منگنی پٹ بیاہ کے مصداق چیف سیکریٹری کوسندھ بھر سے افواج پاکستان کو 9ہزار600ایکڑ زمین دینے کاحکم سنا دیا۔جسکا محکمہ جنگلات نے باضابطہ اجازت نامہ بھی جاری کردیا۔اجلاس میں وزیر اعلی سندھ کا کہنا تھا کہ پاک فوج کے جن500 شہداء کو زمینیں دی جا رہی ہیں ان میں 200کا تعلق سندھ سے ہے۔