اسلام آباد (نیوز ڈیسک) وزیراعظم شہباز شریف نے آج ایران کے صدر ڈاکٹر مسعود پزشکیان سے ٹیلی فون پر رابطہ کیا اور خطے کی موجودہ صورتحال پر تبادلۂ خیال کیا۔
یہ رابطہ ایسے وقت میں ہوا ہے جب ایران کے خلاف امریکی کارروائیوں کے خدشات میں اضافہ ہو رہا ہے اور امریکا کی جانب سے بحری بیڑے کی تعیناتی کی اطلاعات سامنے آ چکی ہیں۔گفتگو کے دوران وزیراعظم شہباز شریف اور ایرانی صدر نے خطے میں تیزی سے بدلتے حالات کا تفصیلی جائزہ لیا اور اس بات پر اتفاق کیا کہ امن، استحکام اور ترقی کے لیے سفارتی کوششوں اور مسلسل رابطے کو جاری رکھنا انتہائی ضروری ہے۔ دونوں رہنماؤں نے اس امر پر زور دیا کہ بات چیت اور تعاون ہی علاقائی کشیدگی کو کم کرنے کا مؤثر ذریعہ ہے۔اس موقع پر دونوں رہنماؤں نے پاکستان اور ایران کے دیرینہ اور برادرانہ تعلقات کو مزید مضبوط بنانے کے عزم کا اعادہ کیا۔
انہوں نے اعلیٰ سطحی روابط، ادارہ جاتی تعاون اور باہمی ہم آہنگی کو فروغ دینے پر اتفاق کیا تاکہ دوطرفہ تعلقات کو اعتماد، احترام اور مشترکہ مفادات کی بنیاد پر آگے بڑھایا جا سکے۔
