اسلام آباد(نیوز ڈیسک)شریف خاندان کے ارکان نے اتوار کے روز جاتی امرا میں واقع اپنی رہائش گاہ پر ملاقات کی، جس کا مقصد ملک کی موجودہ سیاسی صورتحال پر غور و خوض کرنا اور خصوصاً اپوزیشن جماعت پاکستان تحریکِ انصاف (پی ٹی آئی) کے آئندہ لائحہ عمل اور پنجاب میں انتظامی تبدیلیوں پر مشاورت کرنا تھا۔ڈان اخبار کی رپورٹ کے مطابق ملاقات میں وزیرِاعظم شہباز شریف، وزیراعلیٰ پنجاب مریم نواز اور مسلم لیگ (ن) کے صدر نواز شریف شریک ہوئے۔ ذرائع نے بتایا کہ تقریباً دو گھنٹے تک جاری رہنے والی اس گفتگو میں پی ٹی آئی کی ممکنہ حکمتِ عملی اور وفاقی و صوبائی حکومتوں کے مؤثر اقدامات پر تفصیلی تبادلہ خیال ہوا۔
ملاقات کے دوران یہ بھی زیر بحث آیا کہ عمران خان کی جماعت میں موجودہ حیثیت کیا ہے اور آیا پی ٹی آئی قیادت اپنے بانی کی رہنمائی پر انحصار جاری رکھے گی یا اسٹیبلشمنٹ کے اب تک کے سخت ردعمل کے بعد خود کو ان سے دور کرے گی۔ذرائع کے مطابق شریف خاندان نے سیاسی اور معاشی امور میں حکومت کے اقدامات کے ساتھ ساتھ اسٹیبلشمنٹ کے رویے اور اس کے ممکنہ اثرات کا بھی جائزہ لیا۔ اس موقع پر مریم نواز نے پنجاب کابینہ کی تازہ کارکردگی رپورٹ بھی اپنے والد اور چچا کو بریف کی، جس میں آڈٹ کے ذریعے سامنے آنے والی نمایاں خامیوں کی نشاندہی کی گئی۔ذرائع نے مزید بتایا کہ وزیراعلیٰ پنجاب نے اپنی کابینہ میں ممکنہ ردوبدل اور نئے وزرا کی شمولیت کے ذریعے حکومت کی مجموعی کارکردگی کو بہتر بنانے کے اپنے ارادے کا بھی اظہار کیا۔
