اسلام آباد (نیوز ڈیسک) پاکستان میں نئے اسلامی سال 1447 ہجری کا آغاز ہو گیا ہے، کیونکہ محرم الحرام کا چاند نظر آنے کی باقاعدہ تصدیق کر دی گئی ہے۔مرکزی رویت ہلال کمیٹی کا اہم اجلاس چیئرمین مولانا عبدالخبیر آزاد کی سربراہی میں کوئٹہ میں منعقد ہوا، جس میں محکمہ موسمیات اور سپارکو کے ماہرین سمیت زونل و ضلعی کمیٹیوں کے نمائندے شریک ہوئے۔

اجلاس کے دوران ملک کے مختلف علاقوں سے چاند نظر آنے کی شہادتیں موصول ہوئیں۔چاند نظر آنے کے بعد مولانا عبدالخبیر آزاد نے میڈیا سے گفتگو میں اعلان کیا کہ 1447 ہجری کا آغاز جمعہ 27 جون سے ہوگا۔ اس حساب سے 9 محرم الحرام 5 جولائی بروز ہفتہ جبکہ یوم عاشور، 10 محرم الحرام، 6 جولائی بروز اتوار کو منایا جائے گا۔مرکزی کمیٹی کے مطابق چاند دیکھنے کی شہادتیں ملک کے مختلف شہروں سے موصول ہوئیں، جنہیں جانچنے کے بعد فیصلہ کیا گیا۔