لندن (نیوز رپورٹر) مسلم لیگ (ن) کے سربراہ اور سابق وزیر اعظم نواز شریف نے کہا ہے کہ ایران سے متعلق حکومتی مؤقف درست اور اصولی ہے، کیونکہ ایران کے خلاف جو رویہ اپنایا جا رہا ہے وہ جارحیت کے زمرے میں آتا ہے۔
لندن میں اپنے اعزاز میں دیے گئے ظہرانے سے خطاب کرتے ہوئے نواز شریف نے موجودہ حکومت کی داخلی اور خارجی پالیسیوں کی تعریف کی اور کہا کہ ریاستی سطح پر معاملات نہایت مؤثر انداز میں چلائے جا رہے ہیں۔
انہوں نے کہا کہ ایران کے ساتھ پاکستان کے نہ صرف مذہبی اور ثقافتی رشتے ہیں بلکہ وہ ایک اہم ہمسایہ ملک بھی ہے، ایسے میں اس کے خلاف جارحانہ اقدامات کی مخالفت حکومت کا جائز مؤقف ہے۔
سابق وزیر اعظم نے بھارت کے ساتھ کشیدگی کا ذکر کرتے ہوئے کہا کہ پاکستان نے ہمیشہ جارحیت کے مقابلے میں اپنا دفاع کیا ہے، اور ملکی فوجی طاقت دفاعی مقاصد کے لیے ہے، نہ کہ حملے کے لیے۔
ان کا مزید کہنا تھا کہ ان کے اور وزیراعظم شہباز شریف کے درمیان کوئی اختلاف نہیں، ہم دونوں ایک ہی سوچ رکھتے ہیں، اس لیے قیادت کا فرق کوئی معنی نہیں رکھتا۔
نواز شریف نے مسلم لیگ (ن) کے بیرون ملک مقیم کارکنوں کو پارٹی کا سرمایہ قرار دیا اور کہا کہ موجودہ چیلنجز کا مقابلہ کرنے کے لیے پوری قوم کو یکجہتی کے ساتھ آگے بڑھنا ہوگا۔
ذرائع کے مطابق نواز شریف لندن میں اپنے قیام کے بعد کل پاکستان واپسی کے لیے روانہ ہوں گے۔
