اسلام آباد (نیوز ڈیسک)اسرائیلی فوج کی جانب سے ایک ایسی تصویر جاری کی گئی ہے جس میں مقبوضہ کشمیر کو پاکستان کا حصہ دکھایا گیا، جس پر بھارت میں شدید ردِعمل دیکھنے میں آیا۔بین الاقوامی خبر رساں ادارے کے مطابق، اسرائیلی ڈیفنس فورسز نے سوشل میڈیا پر ایک نقشہ شیئر کیا جس میں مقبوضہ جموں و کشمیر کو پاکستان میں شامل دکھایا گیا، جبکہ بھارت کی کچھ شمالی ریاستوں کو نیپال کے ساتھ منسلک کر دیا گیا تھا۔اس تصویر کے منظرِ عام پر آنے کے بعد سوشل میڈیا پر بھارتی صارفین نے شدید برہمی کا اظہار کیا۔ اسرائیل کی حمایت میں آواز بلند کرنے والے بھارتی صارفین خود ہی اسرائیلی فوج کو تنقید کا نشانہ بنانے لگے۔
بعض افراد نے کہا کہ “کیا ہم نے اسرائیل کی حمایت اسی دن کے لیے کی تھی؟”صورتحال کی شدت کو دیکھتے ہوئے اسرائیلی فوج نے اپنی اس غلطی پر باقاعدہ معذرت کی اور وضاحت پیش کی کہ یہ ایک غیر ارادی تکنیکی غلطی تھی، جسے فوری طور پر درست کر دیا گیا ہے۔واضح رہے کہ اسرائیل اور بھارت کے درمیان حالیہ برسوں میں تعلقات میں قربت دیکھی گئی ہے، تاہم اس قسم کی غلطی نے بھارتی سوشل میڈیا صارفین میں بےچینی کی لہر دوڑا دی ہے۔
