اسلام آباد (این این آئی)انتہائی فخر اور غیر متزلزل حب الوطنی کے جذبے کے ساتھ پشاور زلمی اور زلمی فاؤنڈیشن کے چیئرمین، جاوید آفریدی نے پاکستان کے بہادر فضائی محافظین کو خراجِ تحسین پیش کرنے کے لیے 5 کروڑ روپے کا اعلان کیا ہے۔

یہ خراجِ تحسین حالیہ واقعات کے تناظر میں پیش کیا گیا ہے،ایک ایسی صورتحال میں جہاں بڑے پیمانے پر نقصان اور جانی ضیاع کا خطرہ تھا، پاکستان کے فضائی محافظین نے برق رفتاری، درستگی اور جرات مندی سے کارروائی کرتے ہوئے کسی بھی نقصان یا جانی ضیاع کو رونما نہیں ہونے دیا۔جاوید آفریدی نے کہا کہ ان کی بے مثال جرات، لگن اور قربانی ہماری قومی شان کا دل ہے۔ آج ہم انہیں صرف الفاظ سے نہیں بلکہ عملی اقدامات کے ذریعے خراجِ تحسین پیش کر رہے ہیں۔انہوںنے کہاکہ یہ محض ایک علامتی اقدام نہیں بلکہ قومی یکجہتی اور ان ہیروز کے لیے گہرے احترام کی مضبوط علامت ہے جو بے خوفی سے ہمارے آسمانوں کی حفاظت کرتے ہیں۔

یہ زلمی فاؤنڈیشن کے اس عزم کی عکاسی کرتا ہے کہ وہ ان لوگوں کے ساتھ کھڑی ہے جو ملک و قوم کی خدمت کو اپنا فخر سمجھتے ہیں۔انہوںنے کہاکہ نوجوانوں کو بااختیار بنانے اور قومی ترقی کے لیے اپنی وابستگی کے لیے جانی جانے والی زلمی فاؤنڈیشن جذبے کے ساتھ قیادت کرتی رہے گی — انہوںنے کہاکہ جرات کو سلام، اتحاد کو مضبوطی، اور ان کو خراجِ عقیدت جو فرض کو سب کچھ پر مقدم رکھتے ہیں۔