اسلام آباد(این این آئی)سینیٹر فیصل واوڈا نے کہا ہے کہ بانی پی ٹی آئی کی جانب سے یہ آخری کال ہے،اس کے بعد والا فیز سیکنڈ لاسٹ اور پھر آنے والا فیز لاسٹ ہوگا۔نجی ٹی وی کے پروگرام میں شرکت کے دوران فیصل واوڈا نے کہا کہ میرا چیلنج ہے عمران خان نومبر میں رہا نہیں ہوسکیں گے، ہمیشہ کی طرح تحریک انصاف کا یہ شو بھی فلاپ ہوگا۔فیصل واوڈا نے کہاکہ پی ٹی آئی اس وقت دھڑے بندی کا شکار ہے، اور ایک ایم پی اے 50لوگ بھی لے کر آگیا تو میں اس کو سلام پیش کروں گا۔

انہوں نے کہا کہ اس احتجاج میں ریاست 9مئی کے مسنگ لوگوں کو تلاش کرے گی، اگر مراد سعید احتجاج میں آگیا تو پھر عمران خان اور فیض حمید کو کوئی بندہ بچا نہیں سکے گا۔فیصل واوڈا نے کہاکہ خیبرپختونخوا بھارت نہیں بلکہ پاکستان کا حصہ ہے، اگر کے پی میں کوئی تماشہ ہوا تو دھاوا بولنے میں دیر نہیں لگے گی۔انہوں نے کہاکہ لوگوں کو مروانے کیلئے دھرنے میں لایا جارہا ہے، کے پی حکومت کی مشینری ہوگی، 6یا 7ہزار بندہ آجائے گا، نہ کوئی دھرنا ہوگا نہ بلبلہ پھٹے گا۔فیصل واوڈا نے کہاکہ بانی پی ٹی آئی کی جانب سے یہ آخری کال ہے، لیکن اسٹیبلشمنٹ کی جانب سے یہ شغل میلہ ہے، اس کے بعد والا فیز سیکنڈ لاسٹ اور پھر آنے والا فیز لاسٹ ہوگا۔انہوں نے کہاکہ پی ٹی آئی کی لیڈر شپ کو کہیں اس بار غائب نہ ہوجائے، پنجاب میں ن لیگ اور پی ٹی آئی کا پٹاخہ بجنے والا ہے، لوگ نہ بانی کی بہن اور نہ بیگم کو مانتے ہیں، وہ بانی کو ہی مانتے ہیں، ایک دھڑا بیگم صاحبہ کا، ایک بہن کا اور ایک کمپرومائزڈ پی ٹی آئی ہے۔