اسلام آباد(این این آئی)اسلام آباد ہائی کورٹ نے سابق وزیر اعظم عمران خان کو جیل میں بین الاقوامی قوانین کے مطابق سہولیات فراہمی کی درخواست پر تمام فریقین کو نوٹسز جاری کردیے۔ اسلام آباد ہائی کورٹ کے چیف جسٹس عامر فاروق نے کیس کی سماعت کی، درخواست گزار اظہر صدیق ایڈووکیٹ عدالت کے سامنے پیش ہوئے۔

سماعت کے دوران جسٹس عامر فاروق نے درخواستگزار سے مکالمہ کیا کہ آپ کی درخواست پر رجسٹرار آفس کے اعتراضات ہیں۔بعد ازاں عدالت نے درخواست گزار وکیل کی درخواست پر اعتراضات دور کردیے۔اس موقع اظہر صدیق نے کہا کہ سابق وزیر اعظم کو ملنے والی سہولیات جیل رولز، ہائی کورٹ رولز اور بین الاقوامی قوانین کے خلاف ہیں، یہاں پر جیل سہولیات سے متعلق مرکزی کیس کے ساتھ اس درخواست کو منسلک کیا جائے۔ان کا کہنا تھا کہ یہ درخواست صرف عمران خان کی حد تک نہیں بلکہ ان کی اہلیہ بشریٰ بی بی کی حد تک بھی ہے۔بعد ازاں عدالت نے سپرنٹنڈنٹ اڈیالہ جیل سمیت تمام فریقین کو نوٹسز جاری کرتے ہوئے کیس کی سماعت یکم اگست تک ملتوی کردی۔واضح رہے کہ اظہر صدیق ایڈووکیٹ نے دو روز پہلے یہ درخواست دائر کی تھی۔